विराटनगर । प्रधानमन्त्री पुष्पकमल दाहाल प्रचण्डले नेकपा एकीकृत समाजवादी वर्तमान सत्ता समीकरणभन्दा बाहिर नजाने बताएका छन् ।
रोजगार श्रमाधान मेलाको उद्घाटन गर्न विराटनगर आएका दाहालले बिहीबार विराटनगर विमानस्थलमा सञ्चारकर्मीसँग संक्षिप्त कुराकानी गर्दै भने, ‘आज बिहानै मसँग कुराकानी हुँदा नेपालले समीकरण भन्दा बाहिर नजाने भनेर स्पष्ट पार्नुभएको छ ।’
यस्तै, प्रधानमन्त्री प्रचण्डले मधेश प्रदेश सरकार पनि गठबन्धनकै बन्ने दावी गरे । ‘समीकरण भन्दा बाहिर मधेसमा पनि अर्को सरकार बन्दैन’ उनले भने ‘अहिले हाम्रो जे छ त्यही हुन्छ ।’
प्रधानमन्त्री प्रचण्डले संघीय सरकारको बजेटमा कोशी उपेक्षित भएको गुनासोबारे सोधिएको प्रश्नमा त्यस्तो अवस्था नरहेको बताए । विराटनगर रिङरोडदेखि पूर्वाञ्चल विश्वविद्यालयमा मेडिकल कलेज स्थापाना गर्नेसम्मका विषय बजेटमा समावेश भएको उनको दावी छ । ‘अन्य पनि धेरै विषय छन्, वक्तब्यमा आएका विषय मात्र बजेट हैन’ उनले भने ।
प्रचण्डले आगामी आर्थिक वर्षको बजेट सन्तुलित रूपमा आएको बताएका छन् । ‘अहिलेको हाम्रो आर्थिक स्थिति र सबै राजनीतिक परिस्थिति हेर्दा यो एउटा सन्तुलित रूपमा आएको बजेट हो,’प्रधानमन्त्री दाहालले भने,‘सबै विज्ञहरुले त्यही रूपमा लिएका छन् ।’
उत्पादन,उत्पादकत्व र रोजगारीलाई केन्द्रित गरेर बजेट आएको बताए । थुप्रै नयाँ कार्ययोजना र रोजगारीको ठोस कार्यक्रमसहित बजेट ल्याइएको उनको भनाइ छ ।
