विराटनगर । सुनसरी र मोरङको दुई छुट्टाछुट्टै स्थानबाट ६९० किलोग्राम लागुऔषध गाँजासहित चार जनालाई प्रहरीले पक्राउ गरेको छ ।
मिनी ट्रकमा ठुलो परिमाणमा गाँजा लोड गरेर सुनसरीको देवागन्जबाट साहेबगन्जतर्फ लैजाँदै गरेको भन्ने विशेष सूचनाको आधारमा प्रहरीले चार सय ४० किलो गाँजा बरामद गरेको थियो ।
गए राति इलाका प्रहरी कार्यालय साहेबगन्जबाट खटिएको प्रहरी टोलीले देवानगञ्ज गाँउपालिका-५ मेहेता टोलको भित्री सडक खण्डबाट को १ ख ७१२३ नम्बरको मिनी ट्रकबाट गाँजा बरामद गरेको हो ।
ट्रकबाट गाँजा बरामद भएसँगै चालक भीमफेदी नगरपालिका-१४ मकवानपुरका २५ वर्षीय चन्द्रबहादुर पाख्रिङ, सोही ट्रकमा सवार रहेका लेटाङ नगरपालिका-६ मोरङका बलबहादुर लिम्बु र देवानगन्ज-४ का ३० वर्षीय अरबिन्द पाललाई प्रहरीले पक्राउ गरेको छ ।
पक्राउ परेका उनीहरूको साथबाट प्रहरीले भारतीय रुपैयाँ एक लाख ५० हजार, नेपाली रुपैयाँ ५२ हजार र पाँच थान मोबाइल सेटसमेत बरामद गरेको छ ।
यसैगरी, मोरङको विराटनगर महानगरपालिका-१७ आइसिपी रोडमा काँचो केरा बोकेको प्रदेश १-०२-०२ च. ६३३१ नम्बरको पिकप भेनबाट केरासहित गाँजा अनलोड गर्दै गरेको भन्ने विशेष सूचना आधारमा दुई सय ८० किलो गाँजा बरामद गरेको हो ।
गए राति इलाका प्रहरी कार्यालय रानीबाट खटिएको प्रहरी टोलीले उक्त पिकप भेनबाट गाँजा बरामद गरेको थियो ।
गाँजा बरामद भएसँगै चालक सहिदभूमि गाँउपालिका-३ धनकुटाका १८ वर्षीय दिवस राईलाई प्रहरीले पक्राउ गरेको हो ।
लागुऔषध गाँजासहित पक्राउ परेका उनीहरूको सम्बन्धमा प्रहरीले थप अनुसन्धान गरिरहेको छ ।
