विराटनगर । कोशी प्रदेशका मुख्यमन्त्री हिक्मतकुमार कार्कीलाई केन्द्रीय सत्ता गठबन्धनमा रहेका सबै दलले विश्वासको मत दिने भएका छन् ।
नेकपा एमाले र नेकपा माओवादी केन्द्रका ५२ प्रदेशसभा सदस्यको समर्थनमा मुख्यमन्त्रीमा नियुक्त भएका कार्कीलाई एकीकृत समाजवादी र जसपाले समेत विश्वासको मत दिने भएका हुन् ।
कोशी प्रदेश नयाँ सरकार गठनको प्रक्रियामा सामेल नगराइएको भन्दै असन्तुष्ट रहेका एकीकृत समाजवादी संसदीय दलका नेता तथा पूर्व मुख्यमन्त्री राजेन्द्र राईले मुख्यमन्त्री कार्कीलाई आफ्नो पार्टीले विश्वासको मत दिने बताए ।
उनले आफू काठमाडौंमा रहेकाले सभामा उपस्थित हुन नसके पनि दलको तर्फबाट विश्वासको मत दिने बताए । उनले भने आफू नआए पनि बहुमत पुग्ने भएकाले कामका कारण विश्वासको मत दिन आफू भने अनुपस्थित रहने बताए ।
यस्तै, जसपा नेपालले पनि मुख्यमन्त्री कार्कीलाई विश्वासको मत दिने बताएका छ । प्रदेशसभा सदस्यमा एक सिट रहेको जसपाकी सांसद निर्मला लिम्बुले आफू पार्टीको बफादार सिपाही भएकाले पार्टीको निर्देशनअनुसार विश्वासको मत दिने बताइन् ।
संविधानको धारा १६८ (५) अनुसार गत बिहीबार मुख्यमन्त्रीमा नियुक्त भएका कार्कीले उपधारा ४ अनुसार आज विश्वासको मत लिन लागेका छन् ।
कोशीमा नयाँ सरकार गठन भएपछि प्रदेश प्रमुखले प्रदेशसभा अधिवेशन आह्वान गरेका मुख्यमन्त्री कार्कीले आज विश्वासको मत लिनेगरी प्रस्तावको सूचना प्रदेशसभामा दिएका थिए । सोहीअनुरूप मुख्यमन्त्री कार्कीले आफूलाई सदनबाट बहुमत सिद्ध गर्न आँटेका हुन् ।
कोशी प्रदेशसभामा ९३ सांसदमध्ये बहुमत पुर्याउन ४७ सांसद आवश्यक पर्छ, जुन कार्कीको पक्षमा सहजै पुग्ने देखिन्छ ।
