विराटनगर । कोशी प्रदेशका मुख्यमन्त्री हिक्मतकुमार कार्किले सोमबार (आज) विश्वासको मत लिँदै छन् ।
संविधानको धारा १६८ (५) अनुसार गत बिहीबार मुख्यमन्त्रीमा नियुक्त भएका कार्कीले उपधारा ४ अनुसार विश्वासको मत लिन लागेका हुन् ।
कोशीमा नयाँ सरकार गठन भएपछि प्रदेश प्रमुखले प्रदेशसभा अधिवेशन आह्वान गरेर मुख्यमन्त्री कार्कीले आज विश्वासको मत लिनेगरी प्रस्तावको सूचना प्रदेशसभामा दिएका थिए ।
सोहीअनुरूप मुख्यमन्त्री कार्कीले आफूलाई सदनबाट बहुमत सिद्ध गर्न आँटेका हुन् ।
नेकपा एमाले र नेकपा माओवादी केन्द्रका ५२ सांसदको समर्थनमा मुख्यमन्त्री भएका उनलाई हालसम्म दुवै दलका सांसदले विश्वासको मत दिने देखिएको छ ।
कोशी प्रदेशसभामा ९३ सांसदमध्ये बहुमत पुर्याउन ४७ सांसद आवश्यक पर्छ, जुन कार्कीको पक्षमा सहजै पुग्ने देखिन्छ ।
तथापि, केन्द्रीय सरकारमा सहभागी नेकपा एकीकृत समाजवादी पार्टीले भने विश्वासको मत नदिने बताएको छ ।
एकीकृत समाजवादी कोशी प्रदेश संसदीय दलका नेता राजेन्द्रकुमार राईले अदालतमा मुख्यमन्त्रीकै विरुद्धको मुद्दा विचाराधीन अवस्थामा रहेको बेला विश्वासको मत लिन खोज्नु गलत भएको बताए ।
आइतबारको कार्यव्यवस्था समितिको बैठकमा नेपाली कांग्रेसले विश्वासको मत लिन हतार नगर्न आग्रह गरेको थियो ।
