विराटनगर । शुक्रबारबाट विधिवत रूपमा समापन भएको सुनसरीको चतराधाममा एक महिनासम्म लागेको बाह्रवर्से पिण्डेश्वर पूर्ण महाकुम्भ मेलामा एक हजार ६ सय स्काउट परिचालित भएका छन् ।
स्थानीय स्काउट विराटनगर प्रमुख आयुक्त नवीन पहाडीका अनुसार गत चैत २७ गतेदेखि समापनका दिनसम्म महाकुम्भ मेलामा एक हजार ६ सय जना स्काउट, रोभर-रेन्जर र स्काउटरहरूले सेवा प्रदान गरेका हुन् ।
प्रदेश स्काउट कार्यालयको समन्वय र स्थानीय स्काउट कार्यालय, बराहक्षेत्र नगरपालिकाको व्यवस्थापनमा स्काउट स्वयंसेवकहरू परिचालन गरिएको हो ।
बराहक्षेत्र नगरमा सञ्चालित स्काउट दलहरू र कोशी प्रदेशका स्काउटर र रोभर/ रेन्जरहरूले कुम्भमा सेवा उपलब्ध गराएका हुन् ।
स्काउट स्वयंसेवकहरूले कार्यक्रम व्यवस्थापन, श्रद्धालु भक्तजनको लाइन व्यवस्थापनमा सक्रिय सहभागिता जनाएको पहाडीले बताए ।
अरू दिनहरूमा दैनिक विभिन्न आवश्यक क्षेत्रमा स्काउट स्वयंसेवकहरूले सेवा प्रदान गरेका हुन् ।
प्राचीन हरिद्वारका नामले समेत प्रसिद्ध चतराधाममा २०५९ सालेखि पूर्णमहाकुम्भ मेला आयोजना हुँदै आएको छ । चतराधाममा प्रत्येक छ वर्षमा अर्धकुम्भ र बाह्र वर्षमा पूर्णकुम्भ मेला लाग्नेगरेको छ ।
