विराटनगर । सर्वोच्च अदालतले कोशी प्रदेशका निवर्तमान मुख्यमन्त्री केदार कार्कीलाई अन्तरिम आदेश दिन अस्वीकार गरेको छ ।
एमालेका हिक्मत कार्कीलाई मुख्यमन्त्री नियुक्त गरिएपछि नेपाली कांग्रेसका केदार कार्की उक्त नियुक्त बदर माग गर्दै सर्वोच्च पुगेका थिए । तर, हरि फुयाँलको एकल इजलासले अन्तरिम आदेश दिन अस्वीकार गरेको हो ।
संवैधानिक व्याख्याको विषय भएकाले उक्त विवादको टुंगो पूर्ण सुनुवाइबाट लाग्ने भएकाले अन्तरिम आदेश आवश्यक नरहेको आदेशमा भनिएको छ ।
अब, कार्कीको रिट जेठ ९ गते पूर्ण इजलासमा सुनुवाइ हुने भएको छ ।
कार्कीले नयाँ सरकार गठनविरुद्ध सर्वोच्च अदालतमा बिहीबार दिउँसो दर्ता गराएका थिए ।
रिट निवेदनमा कार्कीले अन्तरिम आदेशमार्फत प्रदेश प्रमुखको आह्वानलाई बदर गर्न माग गर्नुका साथै आफूलाई मुख्यमन्त्रीमा निरन्तरता दिन माग गरेका थिए ।
रिट दर्ता हुनुअगावै कोशी प्रदेशको नयाँ मुख्यमन्त्रीमा एमाले प्रदेश संसदीय दलका नेता हिक्मतकुमार कार्की नियुक्त भएका थिए ।
