विराटनगर । मोरङको ग्रामथान गाउँपालिका-२ झोराहाटस्थित जनक मेमोरियल बोर्डिङ स्कुलले प्रगति विवरण तथा छात्रवृत्ति वितरण कार्यक्रम गरेको छ ।
विद्यालय प्रांगणमा शुक्रबार स्कुलले विद्यार्थी, अभिभावकको उपस्थितिमा एक कार्यक्रमको आयोजना गरी छात्रवृत्ति प्रदान र विद्यार्थीलाई सम्मान गरेको हो ।
विद्यालयमा अध्ययनरत कक्षा नर्सरीदेखि १० सम्मका ४४ जना विद्यार्थीलाई सात लाख २५ हजार एक सय रुपैयाँ बराबरको छात्रवृत्ति प्रदान गरिएको थियो । प्रत्येक कक्षाका १० उत्कृष्ट विद्यार्थी छनोट गरी १० मध्ये उत्कृष्ट तीन विद्यार्थीहरूलाई छात्रवृत्ति प्रदान गरिएको हो ।
उनीहरूलाई स्कुलका प्रिन्सिपल सुनील भगत,शैक्षिक प्रमुख सुरज अधिकारी, लेखा प्रमुख आलोक अधिकारी, प्लस टु कोअर्डिनेटर वीरेन्द्रकुमार चौधरी, व्यवस्थापक सुखाराम माझीले छात्रवृत्ति वितरण गरे ।
कार्यक्रममा स्वागत मन्तव्य राख्दै प्लस टु कोअर्डिनेटर वीरेन्द्रकुमार चौधरीले अभिभावक र विद्यार्थीको समन्वयले नै जनक उत्कृष्ट विद्यालयको लयमा रहेको बताए ।
यसैगरी, कक्षा क्याप्टेन र भाइस क्याप्टेन पनि चयन गरिएको थियो । उनीहरूलाई विद्यालयका शिक्षक-शिक्षिकाले अभिर, खदा र प्रमाणपत्रसहित सम्मान गर्दा पूर्व क्याप्टेन र पूर्व भाइस क्याप्टेनले ब्याच वितरण गरे ।
यस्तै, शैक्षिकसत्र २०८० भरिमा विद्यालयकै उत्कृष्ट बनेका चार विद्यार्थी १० हजार राशि र प्रमाणपत्रसहित सम्मानित भए ।
कार्यक्रममा बोल्दै अभिभावक नारायण थन्दारले यस्ता कार्यक्रमले विद्यार्थीमा हौसला र अभिभावकमा पनि उत्साह छाउने सुनाए ।
कार्यक्रममा विद्यालयका व्यवस्थापक सुखाराम माझीले २०६५ सालदेखि नै विद्यार्थीको मनोवल बढाउन छात्रवृत्ति प्रदान गर्ने गरिएको बताए ।
विद्यालयका प्रिन्सिपल सुनील भगतले पढाइमा मात्र नभए अतिरिक्त क्रियाकलापमा पनि जनक अब्बल रहेको बताए ।विद्यालयका उत्कृष्ट ११३ जना विद्यार्थीलाई सम्मान गरिएको जनाउँदै उनले आगामी दिनमा पनि छात्रवृत्ति प्रदानको कामलाई निरन्तरता दिने बताए ।
विद्यालयका शैक्षिक प्रमुख तथा कार्यक्रमका सभापति सुरज अधिकारीले सन् १९९१ मा स्थापित विद्यालयले यसअघि समेत छात्रवृत्ति उपलब्ध गराउँदै आएको भए पनि यसपालि चेक नै बनाएको प्रदान गरिएको बताए ।
कार्यक्रममा सहायक लेखा सुरेन्द्र भगत, निमावि इन्चार्ज करणकुमार माझीलगायत शिक्षक-शिक्षिकाको उपस्थिति रहेको थियो ।
