विराटनगर । मोरङको विराटनगरमा बुधबार भएका दुई भिन्नाभिन्नै दुर्घटनामा परी दुई महिला घाइते भएका छन् ।
हिजो बिहान ९ बजेतिर विराटनगर-८ देवकोटा चोकमा हाटखोलाबाट विराटनगरतर्फ आउँदै गरेको प्र१-०२-०५०प ९९८५ नम्बरको मोटरसाइकलले विपरीत दिशाबाट जाँदै गरेको साइकललाई ठक्कर दिएको थियो ।
सो दुर्घटनामा साइकल चालक विराटनगर-१० बस्ने ३८ वर्षीया कमला पौडेल घाइते बनेकी छन् । उनको मकालु एभरेस्ट अस्पताल विराटनगर उपचार भइरहेको प्रहरीले जनाएको छ ।
उनको उपचार मोटरसाइकल चालक कटहरी गाउँपालिका-२ बस्ने ३० वर्षीय सरोज यादवले गराइरहेका छन् भने मोटरसाइकल र साइकल वडा प्रहरी कार्यालय हाटखोलाको नियन्त्रणमा छ ।
चालकको लापरवाहीले गर्दा दुर्घटना भएको प्रहरीको प्रारम्भिक अनुसन्धानले देखाएको छ ।
यस्तै, हिजो राति ९:३० बजेतिर विराटनगर-१ पानी ट्यांकी छेउमा तत्काल नम्बर नखुलेको मोसाले पैदलयात्रीलाई ठक्कर दिएको छ ।
मोटरसाइकलको ठक्करबाट सोही स्थानकी अन्दाजी ५५ वर्षीया मीना तामाङ घाइते बनेकी छन् ।
टाउकोमा चोट लागेर घाइते बनेकी उनको नोबेल अस्पताल विराटनगरमा उपचार भइरहेको छ भने ठक्कर दिने मोटरसाइकल चालक मोटरसाइकलसहित फरार रहेकाले खोजीको काम भइरहेको छ ।
तीब्र गतिको कारण दुर्घटना भएको प्रहरीको प्रारम्भिक अनुसन्धानले देखाएको छ ।
