विराटनगर । कोशी प्रदेशको आन्तरिक मामिला तथा कानुन मन्त्रालयले बर्जु गाउँपालिकाका अग्निपीडितलाई सहयोग गरेको छ ।
आन्तरिक मामिला तथा कानुन राज्यमन्त्री सुनिता गुरुङले सोमबार बर्जु-१, केशलिया खोलाटोलमा आगलागी पीडितलाई सहयोग गरेकी हुन् ।
उनले १२ थान ब्ल्याकेट, १२ थान त्रिपाल र डोरीलगायत सामग्री वितरण गरेकी हुन् ।
आइतबार साँझ ५ बजेतिर उक्त स्थानमा भएको आगलागी विराटनगर, देवानगन्ज र इटहरीलगायतका दमकल र स्थानीयको सहयोगमा नियन्त्रण भएको थियो ।
आगलागीबाट प्रभावित बनेका सुकुम्बासी परिवारले आफूहरूको स्थायी बसोबासका लागि पहल गरिदिन माग गरेका थिए ।
राज्यमन्त्री गुरुङले घर बनाउने पहल गर्ने प्रतिबद्धतासमेत जनाएकी थिइन् ।
