विराटनगर । धनकुटामा सब्जी बोक्ने मिनी ट्रकमा ठुलो परिमाणको गाँजा भेटिएको छ ।
धनकुटाको साँगुरीगढी गाँउपालिका-६ भेडेटार चोकबाट मिनीट्रकमा लोड गरेर राखेको अवस्थामा पाँच सय ४४ किलो गाँजा प्रहरीले बरामद गरेको हो ।
सब्जी बोक्ने मिनिट्रकमा लागुऔषध गाँजाको ओसार पसार भइरहेको भन्ने विशेष सूचनाको आधारमा प्रहरीले गाँजा बरामद गरेको हो ।
आइतबार राति पौने ८ बजे इलाका प्रहरी कार्यालय भेडेटार धनकुटाबाट चेकजाँचमा खटिएको प्रहरी टोलीले भेडेटार चोकमा रोकेर राखेको को १ ख ३२९४ नम्बरको मिनीट्रकलाई चेकजाँच गर्दा गाँजा भेटिएको थियो ।
गाडीमा लोड भएको सब्जीको बोराभित्र प्याक गरी लुकाई छिपाई राखेको अवस्थामा गाँजा बरामद भएको प्रहरीले जनाएको छ ।
गाँजा र सवारी साधन नियन्त्रणमा लिइएको र ट्रकका चालक तत्काल फरार रहेकोले खोजतलास भइरहेको तथा अन्य थप अनुसन्धान भइरहेको जिल्ला प्रहरी कार्यालय धनकुटाले जनाएको छ ।
