झापा । झापामा शनिबार साँझतिर भएका दुईवटा दुर्घटनामा एक बालकको मृत्यु भएको छ भने अरू आठ जना घाइते भएका छन् । घाइतेमध्ये एक जनाको अवस्था गम्भीर छ ।
हिजो अपराह्न ४:४५ बजेतिर कनकाई नगरपालिका-८ बिरिङपुलमा लक्ष्मीपुरबाट सुरुंगातर्फ जाँदै गरेको प्रदेश-१-०१-०१२प ५७७० नम्बर मोटरसाइकल आफैं अनियन्त्रित भई दुर्घटना भएको थियो ।
जसमा घाइते बनेका मोटरसाइकल चालक मेचिनगर नगरपालिका-९ का ३८ वर्षीय गोपाल महत्तको बिर्तासिटी अस्पताल बिर्तामोडमा उपचार भइरहेको छ ।
यस्तै, मोटरसाइकलमा पछाडि सवार कमल गाउँपालिका-३ का २७ वर्षीया पूर्णिमा भण्डारीको को भने बिएन्डसी अस्पताल बिर्तामोडमा उपचार भइहेको छ ।
तर, दुर्घटनामा परेर गम्भीर घाइते भएका पूर्णिमाका आठ वर्षीय छोरा प्रशान्तको भने सोही अस्पतालमा उपचारका क्रममा साँझ ५:४० बजे मृत्यु भएको छ ।
पूर्णिमाका कान्छा आठ महिने छोरा प्रशानको अवस्था भने सामान्य रहेको प्रहरीले जनाएको छ ।
यस्तै, हिजो ५:३० बजेतिर झापाकै कमल गाउँपालिका-५ सीतापूरीस्थित पूर्व-पश्चिम राजमार्गमा दुई मोटरसाइकल एक-आपसमा ठोक्किएका थिए ।
पश्चिमबाट पूर्वतर्फ आउँदै गरेको प्रदेश १-०१-०१६ प १२८३ नम्बरको मोटरसाइकललाई सोही दिशातर्फ आउँदै गरेको प्रदेश १-०१-०१४ प ६४०३ नम्बरको मोटरसाइकले ठक्कर दिई दुर्घटना भएको थियो ।
जसमा, पाँच जना घाइते भएकामध्ये एक जनाको अवस्था गम्भीर छ ।
तीन जना सवार प्रदेश १-०१-०१६ प १२८३ नम्बरको मोटरसाइकल चालक झापा गाउँपालिका-३ का २४ वर्षीय सरित सेख, पछाडि सवार झापा-४ का २० वर्षीय मोहम्मद रसिद र १८ वर्षीया मनारुल हक सामान्य घाइते छन् ।
प्रदेश १-०१-०१४ प ६४०३ नम्बरको मोटरसाइकल चालक कमल गाउँपालिका-२ का २५ वर्षीय काशी
अधिकारीको अवस्था भने गम्भीर छ ।
सोही मोसा पछाडि सवार कमल-४ का ३० वर्षीय डिल्लीराम डांगी भने सामान्य घाइते बनेका छन् । पाँचै घाइतेहरुको लाइफ लाइन अस्पताल दमकमा उपचार भइरहेको प्रहरीले जनाएको छ ।
