विराटनगर । मोरङको ग्रामथान गाउँपालिका वडा नम्बर २ मा मंगलबार साँझ २० मिनेटको अन्तरालमा दुई दुर्घटना भएका छन् ।
ग्रामथानका-२ का दुई भिन्नाभिन्नै स्थानमा २० मिनेटको फरकमा भएका सवारी दुर्घटनामा तीन जना घाइते भएका छन् ।
हिजो साँझ ७ बजेतिर ग्रामथान-२ झोराहाट चोकमा नेताचोकबाट विराटनगरतर्फ आउँदै गरेको प्रदेश १-०२-०५२ प ८२१२ नम्बरको मोटरसाइकलले पैदलयात्रीलाई ठक्कर दिएको थियो ।
बाटो काट्दै गरेका स्थानीय ४५ वर्षीय दिलीप पूर्वेलाई मोटरसाइकलले ठक्कर दिएको थियो । ठक्करबाट खुट्टामा चोट लागेका उनलाई प्रहरीले उपचारको लागि गोल्डेन अस्पताल विराटनगर पठाएको छ ।
प्रहरी चौकी झोराहाटले मोटरसाइकल र चालक सुन्दरहरैंचा नगरपालिका-१ बस्ने अन्दाजी २६ वर्षीय मुकेश खवासलाई नियन्त्रणमा लिएको छ ।
तीव्र गतिमा मोटरसाइकल कुदाएका कारण दुर्घटना भएको छ ।
यस्तै, हिजै साँझ ७:२० बजेतिर ग्रामथान-२ खुन्या कट्टा चोकस्थित पक्की सडकखण्डमा कारले मोटरसाइकललाई ठक्कर दिएको थियो ।
नेताचौकबाट विराटनगरतर्फ आउँदै गरेको को ३५ प ६९७८ नम्बरको मोटरसाइकललाई सोही दिशातर्फ आउँदै गरेको बा.प्रदेश-०१-०२६ च १९९३ नम्बरको कारले ठक्कर दिएको हो ।
जसमा मोटरसाइकल चालक विराटनगर महानगरपालिका-४ का ३३ वर्षीय योगराज श्रेष्ठ र पछाडि सवार ३७ वर्षीय महेन्द्र श्रेष्ठ घाइते भएका छन् ।
उनीहरूलाई उपचारको लागि नोबेल अस्पताल विराटनगर ल्याइएको छ ।
प्रहरी चौकी झोराहाटले दुर्घटनामा परेको मोटरसाइकल र कार तथा कार चालक धनुषाको जनकपुर उपमहानगरपालिका-३ बस्ने ३७ वर्षीय नेत्र साहलाई नियन्त्रणमा लिएको छ ।
