इटहरी । सुनसरीको इटहरी उपमहानगरपालिकामा बस र मोटरसाइकल एक-आपसमा ठोक्किँदा एक जनाको मृत्यु भएको छ ।
मृत्यु हुनेमा इटहरी-५ बस्ने ३७ वर्षीय भोजकुमार श्रेष्ठ रहेको प्रहरी जनाएको छ ।
मंगलबार दिउँसो ३:२५ बजेतिर इटहरी-१२ संविधान चोकस्थित कोशी लोकमार्गमा मोटरसाइकल र बस ठोक्किएका थिए ।
इटहरीबाट खनारतर्फ आउँदै गरेको मे१ख २७३४ नम्बरको बस र विपरीत दिशाबाट जाँदै गरेको को २९ प
४७६७ नम्बरको मोटरसाइकल एक आपसमा ठक्कर खाई दुर्घटना भएको थियो ।
जसमा गम्भीर घाइते भएका मोटरसाइकल चालक श्रेष्ठलाई प्रहरीले उपचारका लागि कोशी अस्पताल विराटनगर पठाएको थियो ।
उपचारका क्रममा ४:१५ बजेतिर उनको मृत्यु भएको प्रहरीले जनाएको छ ।
दुवै सवारी साधन तथा बस चालक मोरङको विराटनगर महानगरपालिका-४ बस्ने ५९ वर्षीय बद्रीनारायण पाण्डे प्रहरी चौकी खनारको नियन्त्रणमा छन् ।
तीव्र गतिको मोटरसाइकल बसमा ठोक्किएका कारण दुर्घटना भएको प्रहरीको प्रारम्भिक अनुसन्धानमा खुलेको छ ।
