धरान । धरान उपमहानगरपालिका–१५ स्थित च्याम्पियन सेकेन्डरी स्कुलले १० कक्षामा पढ्ने पाँचौं ब्याचका विद्यार्थीलाई बिदाइ गरेको छ । शनिबार स्कुल प्रांगणमा एक कार्यक्रमको आयोजना गरी विद्यार्थीहरूलाई बिदाइ गरेको हो ।
माध्यमिक शिक्षा परीक्षा (एसइई) को तयारी गरिरहेका मायाको चिनो र शुभकामनासहित स्कुलले बिदाइ गरेको हो । यही चैत १५ गतेदेखि २७ गतेसम्म हुने एसइइमा सहभागी हुन आँटेका विद्यार्थीहरूलाई च्याम्पियनको कक्षा ९ मा पढ्ने विद्यार्थीहरूले सांगीतिक कार्यक्रमको आयोजना गरी बिदाइ गरे ।
कार्यक्रममा स्कुलकी प्रिन्सिपल नाजु सुवेदी, सल्लाहकार दुर्गा सुवेदी, भाइस प्रिन्सिपल, ज्योत्सना लिम्बुलगायतले शुभकाना दिएका थिए । भावुक हुँदै उनीहरूले सानैदेखि माध्यमिक लेभलसम्म अध्यापन गराएको विद्यार्थी छुट्टिएर जाँदा दुःख लागेको बताए ।
तथापि, उच्च शिक्षाको खुट्किलो मानिने एसइई परीक्षामा उत्कृष्ट नतिजा ल्याएर स्कुलको नाम राख्न विद्यार्थी सफल हुनेमा आफूहरू विश्वस्त रहेको उनीहरूले सुनाए ।
कार्यक्रमको उपलक्ष्यमा कक्षा ९ र १० का विद्यार्थी तथा शिक्षक–शिक्षिकाले गायन तथा नृत्य प्रस्तुत गरेर बिछोडको पललाई रमाइलो बनाएका थिए । यस्तै, उनीहरूले विविध खेल खेलेर उपस्थित अरू विद्यार्थी तथा आगन्तुकलाई मनोरञ्जन दिलाए । साथै, स्काउटमा आबद्ध केही विद्यार्थीलाई धरान नगर स्काउट कमिटिका तालिम आयुक्त मधुसूदन घिमिरेले प्रमाणपत्र प्रदान गरेका थिए ।
शिक्षक र विद्यार्थीले मायाको चिनो साटासाट गरेर अनि तस्बिर खिचाएर बिदाइको पललाई स्मरणयोग्य बनाएका थिए । कार्यक्रमको अन्त्यतिर नेपाली शिक्षक रमेश पौडेलले आज बिदाइ हुँदै गरेका विद्यार्थीप्रति लक्षित कविता वाचन गरेर उपस्थित सबैलाई भावुक बनाएका थिए ।
साथै, विद्यार्थीले विद्यालय बसाइको अनुभव भावुक हुँदै सुनाएपछि उपस्थित सबै आगन्तुकका आँखा रसाएका थिए ।
धरान–१५ स्थित सयपत्री मार्गमा २०६३ सालमा स्थापना भएको च्याम्पियनले गुणस्तरीय शिक्षालाई प्राथमिकतामा राखेर बालकक्षादेखि १० सम्म पठनपाठन गर्दै आएको छ । विद्यार्थीको व्यक्तिगत शिक्षण सिकाइलाई तिखार्दै शान्त र पारिवारिक वातावरणमा पढाइ हुने भइरहेको छ ।
च्याम्पियनमा दक्ष, अनुभवी र सिर्जनशील शिक्षक–शिक्षिकाले व्यवहारिक र प्रयोगात्मक शैली अपनाएर पठन पाठन गर्दै आएका कारण पनि च्याम्पियनप्रति आकर्षण बढेको छ ।
