विराटनगर । मोरङको विराटनगर महानगरपालिकामा स्कुल बसले ठक्कर दिँदा सिटी सफारी चालक घाइते भएका छन् ।
बिहीबार साँझ ५ः२५ बजेतिर विराटनगर-१३ माइती नेपाल चोकस्थित तालिम केन्द्र जाने भित्री पक्की सडक खण्डमा बसले सिटीलाई ठक्कर दिएको थियो ।
विराटनगरबाट रानीतर्फ जाँदै गरेको विराटनगर १ ह. ०७९६ न.को सिटीलाई सोही दिशाबाट आउँदै गरेको को. १ ख. ६८६४ नम्बरको बसले ठक्कर दिएको थियो ।
बसले पछाडिबाट ठक्कर दिई दुर्घटना हुँदा सिटी चालक विराटनगर-१० का ३५ वर्षीय मेघराज मण्डलको दाहिने हातमा चोट लागेको थियो ।
सामान्य घाइते मण्डललाई उपचारका लागि विराटनगरस्थित कोशी अस्पताल पठाइएको प्रहरीले जनाएको छ ।
दुर्घटना गराउने बस विराटनगर-२ बरगाछीमा रहेको कोशी मोडल स्कुलको रहेको प्रहरीले जनाएको छ ।
इलाका प्रहरी कार्यालय, रानीले सिटी, बस, बस चालक विराटनगर-१० कै ३० वर्षीय विकल श्रेष्ठलाई नियन्त्रणमा लिएको छ ।
बस चालकको ध्यान सडकतर्फ केन्द्रित नहुँदा दुर्घटना भएको प्रहरीको प्रारम्भिक अनुसन्धानले औंल्याएको छ ।
