विराटनगर । मोरङको ग्रामथान गाउँपालिकामा दूध बोक्ने गाडीले ठक्कर दिँदा एक जनाको मृत्यु भएको छ ।
मृत्यु हुनेमा ग्रामथान-३ का ५६ वर्षीय हुवालाल माझी रहेको प्रहरीले जनाएको छ ।
बिहीबार बिहान ८ बजेतिर को. २ च २१७ नम्बरको दूध बोक्ने पिकअप गाडीले बाटो क्रस गर्दै गरेको साइकललाई ठक्कर दिएको थियो ।
ग्रामथान-५ मसान चोकस्थित घिनाघाट सडकमा विराटनगरबाट विराटचोकतर्फ जाँदै गरेको पिकअप गाडीले ठक्कर दिँदा साइकलमा सवार रहेका माझी घाइते भएका थिए ।
घाइते माझीलाई उपचारको लागि आर्या न्युरो अस्पताल, विराटनगर ल्याइएकोमा उनको अस्पताल पुर्याउनासाथ मृत्यु भएको थियो ।
घटनामा संलग्न ठक्कर दिने पिकअप र पिकअप चालक विराटनगर महानगरपालिका-१ का ३९ वर्षीय राजेश गुप्तालाई नियन्त्रणमा लिई जिल्ला प्रहरी कार्यालय मोरङबाट थप अनुसन्धान भइरहेको छ ।
