विराटनगर । पूर्व-पश्चिम एसियन राजमार्ग निर्माणका लागि मोरङको कानेपोखरीबाट रुख कटान सुरु भएको छ ।
‘दुई लेन’सडकलाई चार लेनमा रूपान्तरण गर्ने उद्देश्यअनुरुप निर्माण सुरु गरिएको एसियन राजमार्गको पश्चिम खण्डमा मंगलबारदेखि रुख कटान सुरु भएको हो ।
कोशी प्रदेश सरकारका पर्यटन, वन तथा वातावरण मन्त्री गणेशप्रसाद उप्रेतीले पश्चिम खण्डको रुख कटानको सुरुवात गरेका हुन् ।
बुधबार मोरङको कानेपोखरी-७ मा एसियाली विकास बैंकको सहयोगमा विस्तार हुन लागेको पूर्वपश्चिम राजमार्गको सडक किनारका रुख कटान कार्यक्रमको शुभारम्भ गर्दै मन्त्री उप्रेतीले तराईको वन विकासको मेरुदण्ड भएको बताए ।
बाटो निर्माणका लागि रुख काट्नु स्वाभाविक भए पनि रुख काट्नका लागि बाटो बनाउनु उपयुक्त नहुने धारणा उनले व्यक्त गरे ।
सब डिभिजन वन कार्यालय कानेपोखरीका प्रमुख अल्लाउद्दिन अन्सारीका अनुसार मोरङ खण्डको ३६.२ किलोमिटर क्षेत्रमा पाँच हजार ५५६ वटा रुख पर्छन् ।
आयोजना क्षेत्रमा कुल १५ हजार सिएफटी काठ कटान गरिने छ । यसमा लाथ्रा, पोल र ठुला रुख रहेका छन् ।
काँकडभिट्टादेखि लौकहीसम्मको १२० किलोमिटर सडक स्तरोन्नति हुने भनिए पनि हाल ९७.७७० किलोमिटर सडक मात्र ठेक्का लागेको छ ।
सडक दुई खण्डमा ठेक्का लागेको हो ।
काँकडभिट्टादेखि दमकसम्मको ४५ किलोमिटर सडक दमक कार्यालयले हेर्ने छ भने दमकबाट इटहरीपश्चिमसम्मको सडक इटहरी कार्यालयले हेर्ने छ ।
दमकपश्चिमको सडक भाग ३ मा पर्छ । मोरङको मात्र स्वीकृति प्राप्त भएको हो । मोरङ खण्डको सडक किनारका रुख दुई महिनाभित्र हटाइसक्नुपर्ने छ ।
