विराटनगर । नगरपालिकाले लिएको आधारभूत तह उत्तीर्ण परीक्षा (कक्षा ८) को प्रश्नपत्र शिक्षकले नै ‘आउट’ गरेपछि परीक्षा स्थगित गरिएको छ ।
कपिलवस्तुको बुद्धभूमि नगरपालिकाले लिएको परीक्षाको प्रश्नपत्र आउट भएको हो ।
आइतबार सञ्चालन भएको गणित विषयको प्रश्नपत्र परीक्षाअघि नै लिक भएको हो ।
बुद्धभूमि-९ स्थित जनकल्याण माविमा परीक्षा अनुगमनको क्रममा प्रश्न हल भएको हुबहु चिट र कपी भेटिएपछि प्रश्नपत्र बाहिरिएको पुष्टि भएको थियो ।
शनिबार सोही वडाको श्री मावि इमिलियाबाट प्रश्नपत्र आउट गरिएको थियो ।
विद्यालयबाट दुई जना शिक्षकले खाम बन्दीबाट प्रश्नपत्र निकालेर विद्यार्थीलाई हल गराइएको अनुसन्धानबाट खुलेको नगर शिक्षा समितिका सदस्य रामप्रसाद अर्यालले बताए ।
ती शिक्षकले कोचिङ पढ्दै गरेका विद्यार्थीलाई प्रश्नपत्र उपलब्ध गराएका थिए ।
सोमबार नगर शिक्षा समितिको बैठक बसी उक्त विषयको परीक्षा रद्द गरिएको नगरपालिकाले सूचना प्रकाशन गरेको छ ।
रद्द भएको परीक्षा चैत ९ गते गरिने र प्रश्नपत्र आउट गर्ने शिक्षकलाई कानुनअनुसार कारबाही गरिने बताइएको छ ।
