विराटनगर । सुनसरीको बर्जु गाउँपालिका-४ स्थित जयनगर टोलमा आइतबार दिउँसो भएको आगलागीमा २७ घर जलेका छन् ।
जयनगरस्थित मुस्लिम टोलमा ३ः१५ बजेतिर स्थानीय विष्णुदेव पौदारको घरबाट सुरु भएको आगो बस्तीमा फैलिएको थियो ।
आगलागीबाट बस्तीका अधिकांश घर पूर्ण रूपमा जलेको प्रहरीले जनाएको छ ।
विराटनगरसहित विभिन्न पालिकाबाट पुगेका ६ वटा दमकलले आगलागी नियन्त्रणमा लिएको सुनसरी प्रहरीले जानकारी दिएको छ ।
एकैठाउँमा घरहरू टाँसिएका कारण वस्तीभरी आगो फैलिएको बर्जु ४ का वडाध्यक्ष विनोदबहादुर गुरुङले जानकारी दिए ।
आगलागी भएका अधिकांश घर फुसका थिए ।
आगलागीबाट कतिपय पशुचौपाया पनि मरेको जनाइएको छ ।
यस्तै आगलागीमा परेका घरमा रहेका सबै धनमाल जलेको प्रहरीले जनाएको छ ।
आगलागीमा भएको क्षतिको विवरण संकलन भइरहेको सुनसरी प्रहरीले जानकारी दिएको छ ।
आगलागी पीडितहरूलाई गाउँपालिकाको पहलमा टेन्टको व्यवस्थापन गर्ने कार्य भइरहेको छ भने तत्कालको लागि खाद्यान्न वितरण गर्ने वडाध्यक्ष गुरुङले बताए ।
