विराटनगर । माेरङकाे विराटनगरस्थित नाेबेल मेडिकल कलेजमा कार्यरत एक नर्सकाे हत्या भएकाे छ ।
मोरङ प्रहरीका अनुसार विराटनगर महानगरपालिका-४ बुढाथोकी मार्गमा डेरा बस्दै आएकी २२ वर्षीया चन्द्रिकाकुमारी दासको हत्या भएको हो ।
मोरङ प्रहरीका प्रवक्ता प्रहरी नायब उपरीक्षक रन्जनकुमार दाहालले दास विराटनगरको नोबेल शिक्षण अस्पतालमा कार्यरत स्टाफ नर्स रहेको बताए ।
डिएसपी दाहालका अनुसार दासको घर सिराहाको फुल्काह कटी हो । दास अस्पतालनजिक विराटनगर-४ बुढाथोकी मार्गस्थित धीरेन्द्र गिरीको घरमा डेरा बस्दै आएकी थिइन् ।
डेरा बसेको घरको कोठाभित्रको शौचालयमा दिउँसो १२ बजेतिर शव फेला परेको दाहालले बताए ।
उनका अनुसार धारिलो हतियार प्रहार गरेर हत्या गरेपछि शौचालयमा फालेको अवस्थामा शव भेटिएको हो ।
दासको घाँटी, अनुहारलगायत शरीरका विभिन्न भागमा धारिलो हतियारले हानेको गहिरो चोट छ।
हत्यामा संलग्नको पहिचान खुल्न बाँकी छ। घटनामा संलग्न हत्यापछि शव छाडेर फरार भएको पाइएको डिएसपी दाहालले बताए ।
घटनास्थलमा डिएसपी दाहाल नेतृत्वको टोली पुगेको छ । घटनाको अनुसन्धान सुरु गरेर हत्यामा संलग्नको खोजी थालिएको उनले बताए ।
