विराटनगर । झापामा हजुरआमाको हत्या गरेको अभियोगमा नातिसहित चार जना पक्राउ परेका छन् ।
झापाको गौरादह नगरपालिका-७ योगिटारकी ८२ वर्षीया वृद्धा नरमाया विश्वकर्माको हत्या गरेको आरोपमा नातिसहित स्थानीय चार जनालाई प्रहरीले पक्राउ गरेको हो ।
नरमाया फागुन २६ गतेदेखि घरैबाट अचानक हराइरहेकी थिइन् । वृद्धाको खोजतलास गर्ने क्रममा चार दिनपछि आफ्नै घरपछाडि रहेको ग्वालीमा खाल्डो खनेर गाडेको अवस्थामा शव फेला परेको थियो ।
फागुन ३० गते शव फेला परेसँगै घटनाबारे सुक्ष्म अनुसन्धान थालेको इलाका प्रहरी कार्यालय गौरीगन्जको प्रहरी टोलीले घटनामा संलग्न रहेका दुई जनालाई पक्राउ गरेको हो ।
पक्राउ पर्नेमा मृतककै नाति १८ वर्षीय धीरज विश्वकर्मा र स्थानीय १८ वर्षीय राजु मल्लिक रहेका छन् ।
धीरजका अरू साथीहरू टंक दर्नाल र बहादुर दर्जीलाई पक्राउ गरेर अनुसन्धान सुरु गरिएको छ ।
टंक र बहादुर भने भने १८ वर्षभन्दा मुनिका रहेका छन् ।
उनीहरूलाई फागुन ३० गते नै पक्राउ गरिएको प्रहरीले जनाएको छ ।
गाँजा खाई लट्ठ भएका धीरजले फागुन २६ गते राति २ बजेतिर हजुरआमा शौचालय जान उठेको अवस्थामा फलामको रडले टाउको पछाडि प्रहार गरेका थिए ।
रड प्रहारबाट वृद्धाको घटनास्थलमा नै मृत्यु भएको प्रारम्भिक अनुसन्धानको क्रममा खुल्न आएको प्रहरीले जनाएको छ ।
हजुरआमाको मृत्यु भएपश्चात आफ्नो साथी राजु मल्लिकको समेत सहयोगमा घरनजिकै रहेको ग्वालीमा खाल्डो खनेर गाडेको खुलेको छ ।
आफ्नै हजुरआमाले लगाएको गरगहना र वृद्धभत्ता हात पार्नका लागि हत्या गरेको खुलेको प्रहरीले जनाएको छ ।
जिल्ला प्रहरी कार्यालय झापाका प्रमुख मिलन केसीका अनुसार शिवरात्रिको दिन लागुऔषध सेवन गरेर हजुर आमासँग पैसा मागेका थिए ।
तर, नरमायाले दिन नमानेपछि विवाद हुँदा रडले टाउकोमा हानेर वृद्ध हजुरआमाको हत्या गरेको प्रारम्भिक अनुसन्धानको क्रममा खुलेको हो ।
घटना सम्बन्धमा थप अनुसन्धान भइरहेको इलाका प्रहरी कार्यालय गौरीगञ्जले जनाएको छ ।
