विराटनगर । मोरङ प्रहरीले व्यक्तिगत पहिचानको अनाधिकृत प्रयोगबाट ठगी गर्ने संगठित गिरोहलाई पक्राउ गरेको छ ।
पक्राउ पर्नेमा बंगलादेशका दुई जना र एक नेपाली रहेको मोरङ प्रहरी प्रमुख प्रहरी उपरीक्षक नवराज कार्कीले जानकारी दिए ।
एसपी कार्कीका अनुसार बंगलादेश पल्लाबी ढाका बस्ने ४९ वर्षीय महमद महबुर हुसेन र बंगलादेशकै सीतागन्ज बस्ने ३७ वर्षीय महमद तानबिर हुसेन रहेका छन् ।
सोही आरोपमा काठमाडौंको नयाँबजार बस्ने २३ वर्षीया सुनिता खत्रीलाई पनि पक्राउ गरिएको प्रहरीले जनाएको छ ।
सोमबार सुन्दरहरैंचा नगरपालिका-८ सलकपुरका स्थानीय व्यक्तिहरूलाई ठगेको आरोपमा उनीहरू पक्राउ परेका हुन् ।
उनीहरूले नि:स्वार्थ आर्थिक सहयोग गर्ने र आफू परोपकारी संस्था डब्लुबिएससी कम्पनीबाट आएको भन्ने प्रलोभनमा पारी ३० जनाभन्दा बढी ब्यक्तिहरूलाई जनही एक हजार र एक हजार पाँच सयका दरले रकम दिने गरेका थिए ।
त्यसबापत उनीहरूले सम्बन्धित स्थानीय व्यक्तिहरूको नागरिकताको प्रतिलिपि र फोटो लिने गरेका थिए ।
यस प्रकारको गैह्र कानूनी क्रियाकलापसम्बन्धी सूचना प्रहरीलाई प्राप्त हुनासाथ इलाका प्रहरी कार्यालय बेलबारीबाट खटिएको प्रहरी टोलीले सुनितालाई नियन्त्रणमा लिएको थियो ।
मंगलबार दिउँसोतिर सुनितालाई पक्राउ गरेर अनुसन्धान थालेको प्रहरीले बंगलादेशका दुई नागरिकलाई पक्राउ गरेको हो ।
उनीहरू व्यक्तिगत पहिचानको आधिकारिक कागजपत्र प्राप्त गरी सोको दुरूपयोग गर्दै अनधिकृत रूपमा इसेवा, खल्तीलगायतका डिजिटल वालेटहरूको खाता खोल्ने र अनलाइन माध्यमबाट ठगी गर्ने कार्यमा संलग्न अन्तरदेशीय संगठित गिरोहका नाइके रहेको प्रहरीको दाबी छ ।
उनीहरूउपर मोरङ जिल्ला अदालतबाट ठगी उद्योग कसूरमा पाँच दिनको म्याद थप गरी अनुसन्धान भइरहेको प्रहरीले जनाएको छ ।
उनीहरूको साथबाट १५ थान सिमकार्ड, सुनिता खत्री र तानबिर मियाँ दर्जीको नाममा रहेको राहदानी दुई थान बरामद भएको छ ।
साथै, तानबिर मियाँ दर्जी नामको नेपाली नागरिकता एक थान, नगद पाँच हजार रुपैयाँ, एटिएम कार्ड र विभिन्न कम्पनीका चार थान मोबाइल बरामद भएको प्रहरीले जनाएको छ ।
