विराटनगर । धनकुटामा मारुती भ्यान र मोटरसाइकल ठोक्किँदा एक जनाको मृत्यु भएको छ भने दुई गम्भीर घाइते भएका छन् ।
मंगलबार साँझ ६ः४५ बजेतिर धनकुटाको साँगुरीगढी गाउँपालिका-७ गर्जुवास्थित कोशी लोकमार्गमा मारुती भ्यान र मोटरसाइकल ठोक्किएर दुर्घटना भएको थियो ।
भेडेटारबाट मुलघाटतर्फ जाँदै गरेको को. १ च ३२८० नम्बरको मारुती भ्यान र विपरीत दिशाबाट जाँदै गरेको को.३३ प ८३५७ नम्बरको मोटरसाइकल एक-आपसमा ठक्कर खाएर दुर्घटना भएको थियो ।
जसमा मोटरसाइकलमा पछाडि सवार रहेका साँगुरीगढी-६ का २५ वर्षीय २५ दिवश तामाङको मृत्यु भएको हो ।
दुर्घटनामा घाइते भएका उनलाई तत्काल उचारका लागि धरानस्थित विपी कोइराला स्वास्थ्य विज्ञान प्रतिष्ठान पठाइएको थियो ।
उपचारका क्रममा गएराति ८:१८ बजेतिर उनलाई डाक्टरले मृत घोषणा गरेको प्रहरीले जनाएको छ ।
सो दुर्घटनामा मोटरसाइकल चालक साँगुरीगढी-६ का २२ वर्षीय अभिषेक लिम्बु र मारुती भ्यान चालक ३० वर्षीय ३० तुलबहादुर राई गम्भीर घाइते बनेका छन् ।
उनीहरूको सोही अस्पतालमा उपचार भइरहेको प्रहरीले जनाएको छ ।
दुर्घटनामा परेका दुवै सवारीसाधन प्रहरी चौकी, मुलघाटको नियन्त्रणमा रहेका छन् ।
दुर्घटनाको कारण चालक लापरबाही रहेको प्रहरीको प्रारम्भिक अनुसन्धानले देखाएको छ ।
