विराटनगर । मोरङको बेलबारी नगरपालिकामा आगलागीमा परेर एक बालक घाइते भएका छन् ।
सोमबार दिउँसो बेलबारी–४ का गोपाल थापाको गाईगोठमा लागेको आगो घरमा सल्किएको थियो । आगो निभाउने क्रममा जलेर गोपालका नाति १४ वर्षीय निमेष थापा घाइते बनेका हुन् ।
हात, खुट्टा, ढाडलगायत शरीरका विभिन्न भागमा चोट लागेका निमेषलाई उपचारका लागि धरानस्थित विपी कोइराला स्वास्थ्य विज्ञान प्रतिष्ठान लगिएको छ ।
हिजो दिउँसो १२ बजेतिर गोठमा अचानक आगलागी सुरु भएको थियो । आगोले गोठ तथा घरको आधा पाटोसहित अन्नपात, लत्ताकपडा जल्दा तीन लाख बराबरको क्षति भएको प्रहरीको अनुमान छ ।
प्रहरी, स्थानीय र दमकलको सहयोगमा दिउँसो १ बजेतिर आगो नियन्त्रणमा लिइएको थियो ।
