विराटनगर । मोरङको सुन्दरहरैंचामा सोमबार कारले दुईवटा मोटरसाइकललाई ठक्कर दिँदा तीन जना घाइते भएका छन् ।
हिजो अपराह्न ४ः४० बजेतिर सुन्दरहरैचा नगरपालिका-७ चिउरामिलस्थित पूर्व-पश्चिम राजमार्गमा कारले दुईवटा मोटरसाइकललाई ठक्कर दिएको थियो ।
बेलबारीबाट इटहरीतर्फ जाँदै गरेको बा १२ च ६७६ नम्बरको सेतो कारले विपरीत दिशातर्फ आउँदै गरेको को ६ प ६३७७ नम्बरको मोटरसाइकललाई ठक्कर दिएको थियो ।
मोटरसाइकललाई ठक्कर दिई अनियन्त्रित बनेको कारले सोही दिशातर्फ जाँदै गरेको को २९ प ५२२४ नम्बरको मोटरसाइकललाई पनि ठक्कर दिएको थियो ।
सो दुर्घटनामा ६३७७ नम्बरका चालक सुन्दरहरैंचा-८ का ३१ वर्षीय आशीष दासको हात खुट्टामा चोट लागेको थियो । उनी अहिले स्थानीय मेडिकलमा उपचाररत छन् ।
यस्तै, ५२२४ नम्बरका चालक बूढीगंगा गाउँपालिका-५ का ३० वर्षीय अशोक मेहताको टाउको र हात-खुट्टामा चोट लागेको छ ।
सोही मोटरसाइकलमा पछाडि सवार सप्तरीको भारदह बस्ने ३१ वर्षीय महेश मेहताको हात-खुट्टामा चोट लागेको छ ।
सामान्य घाइते रहेका उनीहरूलाई उपचारको लागि विराट टिचिङ अस्पताल ल्याइएको प्रहरीले जनाएको छ ।
सो दुर्घटनापछि भाग्दै गरेका कार चालक रंगेली नगरपालिका-१ का २१ वर्षीय युवराज बिकलाई इलाका प्रहरी कार्यालय, रंगेलीको टोलीले नियन्त्रणमा लिएको छ ।
विकले चलाएको कारसहित उनी रंगेलीमा राखेर प्रहरीले अनुसन्धान थालेको छ ।
दुर्घटनामा परेका मोटरसाइकल भने इलाका प्रहरी कार्यालय, गछियाको नियन्त्रणमा छन् ।
कार चालकको लापरबाहीले दुर्घटना भएको प्रहरीको प्रारम्भिक अनुसन्धानले देखाएको छ ।
