विराटनगर । उपप्रधानमन्त्री तथा गृहमन्त्री रवि लामिछानेले प्रमाणका आधारमा निष्पक्ष भएर अनुसन्धान र कारबाही गर्न निर्देशन दिएका छन् ।
आइतबार प्रहरी प्रधान कार्यालयको निरीक्षण गरेपछि लामिछानेले कुनै पनि घटना वा अपराधको छानबिन वा अनुसन्धान हुँदैगर्दा को प्रतिवादी हुने वा नहुने भन्ने निर्धारण आदेशले नभएर प्रमाणले गर्नुपर्ने बताए ।
‘कानुनको नजरमा अनुहार, पद, प्रतिष्ठा, पहुँच होइन, प्रमाणको आधारमा निष्पक्ष भएर अनुसन्धान र कारबाही गर्नुहोस्,’ उनले भने ।
‘तस्कर, गुन्डा र अपराधीसँग प्रहरी उभिएको र हात मिलाएको दृश्य देख्न नपरोस्,’ उनले थपे, ‘प्रहरी संगठनका विद्यमान समस्या समाधानमा इमान्दार प्रयास गर्ने छु ।’
लामिछानेले राजनीतिक हस्तक्षेपका कारण संगठन र त्यसको नेतृत्वले वृत्ति विकासको सुनिश्चितता गर्न नसक्दा सरुवा–बढुवाका लागि समेत शक्तिकेन्द्र धाउनुपर्ने विद्यमान अवस्था रहको बताए ।
‘कर्मचारी सरुवा–बढुवाका लागि कतै धाउनु नपर्ने अवस्था बनाउन नीति र विधि आवश्यक पर्छ । त्यसको योजना बनाएर ल्याउनुस्, कसरी–के गर्नुपर्छ, म गर्नेछु’ उनले भने ।
‘आफ्नो शक्ति राजनीतिक नेतृत्वलाई नसुम्पिनुहोस् । अनावश्यक भारी नबोक्नुहोस् । निर्धक्क भएर आफ्नो अधिकारको सदुपयोग गर्नुहोस्,’ उनले भने ।
