विराटनगर । विराटनगरस्थित ग्रेडेड बोर्डिङ स्कुलले २९औं वार्षिक उत्सव विभिन्न कार्यक्रम आयोजना गरी मनाएको छ ।
स्कुल परिसरमा बुधबार विभिन्न कार्यक्रमको आयोजना गरी वार्षिकोत्सव मनाएको हो ।
विराटनगर महानगरपालिका प्रमुख नागेश कोइरालले उद्घाटन गरेको वार्षिकोत्सव कार्यक्रमको अवसर पारेर विद्यार्थीहरूले विज्ञान र चित्रकला प्रदर्शनीदेखि गायन र नृत्य प्रस्तुतिसम्म राखेका थिए ।
विज्ञान र चित्रकला प्रर्दशनीका अलावा कार्यक्रममा विद्यार्थीहरूले तयार पारेको एक दर्जन बढी स्टल रहेको थियो ।
कार्यक्रममा विद्यार्थीहरूले फेसन सो, सांस्कृतिक नृत्य र गीत प्रस्तुत गरी दिनभरि अभिभावक, अतिथि र सहभागिहरूलाई मनोरञ्जन प्रदान गरे ।
कार्यक्रमलाई सम्बोधन गर्दै महानगरप्रमुख कोइरालाले विद्यार्थीको चौतर्फी विकासमा विद्यालयले ध्यान दिनुपर्ने बताए ।
स्कुलले गर्ने हरेक क्रियाकलापहरूले विद्यार्थीको विकासमा सहयोग पुग्ने उनले बताए । विज्ञान, चित्रकला र अतिरिक्त क्रियाकलापहरूले विद्यार्थीहरुको प्रतिभा प्रस्फुटन मात्रै नगरेर चौतर्फी विकासमा ठुलो सहयोग पुग्ने उनको भनाइ थियो ।
‘अभिभावकहरूले आफ्ना नानी-बाबुहरूको रुचिअनुसार अगाडि बढन सहयोग गर्नुपर्दछ । उनीहरूको रुचिअनुसार अगाडि बढाउन सकियो भने एक दिन सफलता प्राप्त गर्नेछन्,’ प्रमुख कोइरालाले भने ।
कार्यक्रममा बोल्दै प्याब्सन मोरङका अध्यक्ष तथा ग्रडेड स्कुलका प्रिन्सिपल प्रेमलालसिंह सुवालले विद्यार्थीहरूलाई गुणस्तरीय शिक्षासँगै सीप र संस्कारयुक्त शिक्षा दिएर आफ्नो विद्यालय अगाडि बढेको बताए ।
कार्यक्रममा स्कुलका अध्यक्ष केशवलालसिंह सुवालले अहिलेको शिक्षा प्रविधियुक्त र रोजगारमुखी शिक्षा भएकोले विद्यालयले पनि यसमा जोड दिएर अगाडि बढेको बताए ।
कार्यक्रममा जिल्ला शिक्षा समन्वय इकाइ मोरङका प्रमुख टंक गौतमल, प्याब्सन मोरङका कोषाध्यक्ष विष्णु डंगोल, प्याब्सन विराटनगरका उपाध्यक्ष अर्जुन श्रेष्ठ, अभिभावक संघ कोशी प्रदेशका अध्यक्ष देवी पन्थीलगायतको उपस्थिति रहेको थियो ।
