विराटनगर । मोरङको विराटनगर महानगरपालिका–४ बरगाछीस्थित हेरिटेज इन्टरनेसनल स्कुलले आफ्ना विद्यार्थीलाई खेलकुद प्रशिक्षण दिएको छ ।
खेलकुदमा समानता भन्ने सन्देश दिने उद्देश्यका साथ मंगलबार स्कुलको मैदानमा विदेशी प्रशिक्षकले हेरिटेजका विद्यार्थीहरूलाई प्रशिक्षण दिएका थिए ।
कक्षा ५ देखि ९ सम्मका विद्यार्थीहरूलाई अस्ट्रेलिया र बेलायतबाट आएका क्रिकेट विथआउट बाउन्ड्रिजका स्वयमसेवक प्रशिक्षकले प्रशिक्षण दिएको स्कुलका प्रिन्सिपल सुशान्त बाँनियाले जानकारी दिए ।
नेपाल क्रिकेट फाउन्डेसनको समन्वयमा भएको प्रशिक्षणमा स्वयम्सेवक प्रशिक्षक रचना रामचन्दन, एच लाम्ब, काउप्रेडीलगायत चार जनाको टोलीले सिकाएको बानियाँको भनाइ छ ।
क्रिकेटप्रति उत्सुक रहेका हेरिटेजका विद्यार्थीले बलिङ, ब्याटिङ, फिल्डिङलगायतमा प्राविधिक ज्ञान आर्जन गर्ने मौका पाएका थिए ।
बालबालिकाको सिकाईलाई अझ तीक्ष्ण बनाउन तथा खेलकुदमा हुने लैंगिक विभेद अन्त्य गर्ने योजनाका साथ प्रशिक्षण गराइएको प्रिन्सिपल बानियाले बताए ।
हेरिटेजले पठनपाठनसँगै अतिरिक्त क्रियाकलापअन्तर्गत विभिन्न कार्यहरू गर्दै आएको छ ।
व्यवहारिक र प्रयोगात्मक सिकाइ प्रभावकारी हुने मान्यता राख्दै आएको हेरिटेजमा हालैमात्र बालअधिकार र बाल कर्तव्य अवगत गराउने उद्देश्यले बाल क्लब गठन भएको थियो ।
