विराटनगर । बालविवाह न्युनीकरण गर्न बिहेको निमन्त्रणा कार्डमा बेहुला-बेहुलीकै जन्ममिति राख्नुपर्ने प्रावधान ल्याइएकाे छ ।
रुकुमपश्चिमको आठबीसकोट नगरपालिका वडा नम्बर ३ ले बालविवाह हुन नदिन विवाहको निमन्त्रणा कार्डमा अनिवार्य बेहुला र बेहुलीको जन्ममिति उल्लेख गर्नुपर्ने प्रावधान कार्यान्वयनमा ल्याएको हो ।
बालविवाह हुन नदिन विवाहको निमन्त्रणा ‘कार्ड’ मा अनिवार्य रूपमा बेहुला र बेहुलीको जन्ममिति उल्लेख गर्नुपर्ने प्रावधान कार्यान्वयनमा ल्याइएको आठबीसकोट–३ का वडाध्यक्ष केशरमान विकले जानकारी दिए ।
वडामा यस वर्ष १० जोडीले बालविवाह गरेको तथ्यांक रहेको छ ।
यस वर्ष उमेर नपुगेर विवाह गर्न लागेका एक जोडीको विवाहसमेत वडा कार्यालयले रोकेको जनाएको छ ।
सामाजिक तथा आर्थिक रूपमा पनि बालविवाहले समाजमा नकारात्मक प्रभाव पार्ने भएकाले वडामा बालपिववाह र मदिराजन्य पदार्थमा कडाइ गरिएको वडाध्यक्ष विकको भनाइ छ ।
‘विवाह कार्डमा जोडीको सही जन्ममिति उल्लेख गरे-नगरेको थाहा पाउन वडा कार्यालयमा जन्मदर्तालगायत अन्य विवरणको अभिलेख हुने भएकाले सजिलो छ । वडाभन्दा बाहिरबाट विवाह गर्नेको हकमा सम्बन्धित वडा कार्यालयसम्म समन्वय गर्नेगरी लागेका छौँ । बालविवाह रोक्न समुदायको पनि राम्रो साथ मिलेको छ ‘, वडाध्यक्ष विकले भने ।
वडाको नियम उल्लंघन गरेमा कानुनबमोजिम कारबाही गरिनेसमेत वडा कार्यालय जनाएको छ ।
