विराटनगर । सुनसरीको बर्जु गाउँपालिकामा तीन जना सवार मोटरसाइकल दुर्घटनामा पर्दा एक जनाको मृत्यु भएको छ ।
शुक्रबार साँझ ६:५० बजेतिर बर्जु-६ बागेश्वरी मन्दिरस्थित भित्री पक्की हुलाकीमार्गमा चिमडीबाट हरिनगरातर्फ जाँदै गरेको को१०प ८३ नम्बरको मोटरसाइकल दुर्घटनामा परेको थियो ।
मोटरसाइकल आफैं अनियन्त्रित भई बिजुलीको पोलमा ठक्कर खाई दुर्घटना भएको प्रहरीले जनाएको छ ।
सो दुर्घटनामा मोटरसाइकल चालक देवानगन्ज गाउँपालिका-७ बस्ने राजिन्द्र उरावको छोरा २० वर्षीय जयकुमार उराव, पछाडि सवार २९ वर्षीय मनोजकुमार उराव र २२ वर्षीय निरज उराव घाइते भएका थिए ।
घाइतेमध्य निरजको अवस्था गम्भीर थियो । घाइते तीनै जनालाई उपचारका लागि विराटनगरस्थित गोल्डेन अस्पताल ल्याइएकोमा निरजको उपचारका क्रममा बेलुका पौने ८ बजे मृत्यु भएको प्रहरीले जनाएको छ ।
अरू दुई जना सोही अस्पतालमा उपचाररत रहेको प्रहरीको भनाइ छ ।
इलाका प्रहरी कार्यालय, चिमडीले दुर्घटनामा परेको मोटरसाइकल नियन्त्रणमा लिएको छ ।
मोटरसाइकलमा तीन जना चढेर तीव्र गतिमा चलाएका कारण दुर्घटना भएको प्रहरीको प्रारम्भिक अनुसन्धानमा खुलेको छ ।
