बिर्तामोड । झापाको झापा गाउँपालिका-४ मा रहेको डिल्लीराज माध्यमिक विद्यालयका प्रधानाध्यापक वीरेन्द्रप्रसाद गुप्तालाई विद्यालय प्रवेशमा रोक लगाइएको छ ।
नेपाल कम्युनिस्ट पार्टी (विप्लप समूह) ले बुधबार एक विज्ञप्ति जारी गर्दै प्रअ गुप्ताले गरेको अनियमितता छानबिन नगरेसम्म उनलाई विद्यालय प्रवेशमा रोग लगाइएको जनाएको छ ।
विप्लव समूहको झापा गाउँपालिका कमिटीले विद्यायलभित्र प्रअ गुप्ताले गरेका अनियमितताको छानबिन नगरेसम्म रोक लगाइएको इञ्चार्ज कुमार सिले जनाएका छन् ।
बुधबारै उनीहरूले प्रअ गुप्ताको कोठामा तालाबन्दीसमेत गरेका छन् ।
प्रअ गुप्ताले विद्यालयमा अपारदर्शी ढंगले काम गरेपछि यतिवेला त्यहाँका शिक्षक, कर्मचारी, व्यवस्थापन समिति, अभिभावक, स्थानीयवासी सबै रुष्ट भएका छन् ।
पटक–पटक प्रअ गुप्तामाथि भ्रष्टाचार आरोप लाग्दा पनि छानबिन नभएपछि विप्लप समूहले एक्सन लिएको हो ।
उनीविरुद्ध अख्तियार दुरुपयोग अनुसन्धानको कार्यालयमा उजुरीसमेत परेको छ ।
स्थानीय राजनीतिक दल, बुद्धिजीवी, जग्गादाताहरूले विद्यालयको पारदर्शीता खोजेका छन् ।
तर,प्रअ गुप्ताले उनीहरुको मागलाई वेवास्था गर्दै आएपछि सरोकारवालाहरु थप आक्रोशित बनेका छन् ।
विद्यालयको भौतिक संरचना, दिवा खाजालगायतमा ठूलो अनियमितता गरेको प्रअ गुप्तामाथि आरोप छ ।
विद्यालयमा नियमित लेखापरीक्षण नगरी काम गरेका गुप्तालाई यतिबेला चौतर्फी घेराबन्दी छ ।
