विराटनगर । उदयपुरको त्रियुगा नगरपालिका-८ झोडामा दुर्घटना भई उपचारका क्रममा ज्यान गुमाएका व्यक्ति पूर्वप्रहरी रहेको खुलेको छ ।
शुक्रबार भएको दुर्घटनामा घाइते भएका उदयपुरगढी गाउँपालिका-६ नेपालटारका ३४ वर्षीय रत्नकुमार तामाङको उपचारका क्रममा मृत्यु भएको थियो ।
शुक्रबार बिहान करिब १०:३० बजेतिर त्रियुगा-८ झोडामा नेपालटारबाट गाईघाटतर्फ जाँदै गरेको को२८ प ७०८६ नम्बरको मोटरसाइकल ट्रकसँग ठोक्किएको थियो ।
सोही दिशातर्फ जाँदै गरको प्र १- ०५-०१ क ००३५ नम्बरको ट्रकलाई ओभरटेक गर्ने क्रममा दुर्घटना हुँदा मोटरसाइकल चालक तामाङ गम्भीर घाइते भएका थिए ।
उनी छाती, अनुहार र बाँया हातमा चोट लागेर गम्भीर घाइते भएका थिए । सोही मोटरसाइकलमा पछाडि सवार रत्नकै श्रीमती ३३ वर्षीया उर्मिला तामाङ पनि घाइते भएकी थिइन् । उनको दाहिने हातमा चोट लागेको थियो ।
दुर्घटनामा दुवै जना घाइते भएपछि प्रहरीले उनीहरूलाई जिल्ला अस्पताल गाईघाटमा पुर्याएको थियो ।
उपचारका क्रममा रत्नको शनिबार राति ११ बजेतिर मृत्यु भएको थियो भने उर्मिला सामान्य उपचारपछि घर फर्किएकी छन् ।
उदयपुरगढी-६ नेपालटारका तामाङ घरबाट गाईघाट जाँदै गर्दा झोडामा दुर्घटनामा परेका थिए । पारिवारिक स्रोतका अनुसार रत्नकुमार नेपाल प्रहरीमा कार्यरत थिए ।
वर्षदिन अघिमात्र जागिरबाट राजीनामा दिएका उनी पछिल्लो समय घरमै बस्दै आएका थिए । उनकी श्रीमती उर्मिला भने स्थानीय स्वास्थ्यकर्मी हुन् ।
दुर्घटनामा परेको मोटरसाइकल अस्थायी प्रहरी पोस्ट चुहाडेले नियन्त्रणमा लिएको छ भने ट्रक र ट्रक चालक त्रियुगा-११ का ४० वर्षीय विनोदकुमार चौधरी पनि पक्राउ परेका छन् ।
उनलाई जिल्ला प्रहरी कार्यालयको उदयपुरले नियन्त्रणमा लिएको हो । यस विषयमा थप अनुसन्धान गरिरहेको उदयपुर प्रहरीले जनाएको छ ।
