विराटनगर । मोरङको उर्लाबारीका स्वास्थ्यकर्मी सवार बस झापामा पल्टिँदा १४ जना घाइते भएका छन् ।
उर्लाबारी हस्पिटलको स्वास्थ्यकर्मीहरू पिकनिक खाएर फर्किँदै गर्दा उनीहरू सवार बस शनिबार साँझ ४:४५ बजेतिर शिवसताक्षी नगरपालिका-१० किरात चोकमा पल्टिएको थियो ।
शिवसताक्षी-१० दोमुखामा वनभोज खाएर उर्लाबारीतर्फ फर्किएको को १ ख ६३०५ नम्बरको बस पूर्व-पश्चिम राजमार्गअन्तर्गत किरात चोकमा आफैं अनियन्त्रित भई पल्टिएको थियो ।
दुर्घटनामा बसमा सवार अन्दाजी ३०-३५ जनामध्ये १४ जना घाइते भएका थिए । प्रहरीले उनीहरूलाई उद्धार गरी उपचारको लागि अरनिको अस्पताल उर्लाबारी पठाएको थियो ।
इलाका प्रहरी कार्यालय, झिलझिलेले बस चालक उर्लाबारी-५ बस्ने ४१ वर्षीय चन्द्रकुमार फुँयाललाई नियन्त्रणमा लिएको छ ।
चालकको लापरबाहीले गर्दा दुर्घटना भएको प्रारम्भिक अनुसन्धानमा खुलेको जनाउँदै प्रहरीले यस विषयमा थप अनुसन्धान भइरहेको जनाएको छ ।
दुर्घटनामा उर्लाबारी-६ का ४६ वर्षीय ताराप्रसाद अधिकारी, उनकी श्रीमती ४३ वर्षीया उमा खनाल, उर्लाबारी-५ का ५५ वर्षीय बहादुर चौधरी, उनकी श्रीमती ५३ वर्षीय पवित्रा लामिछाने, उर्लाबारी-४ बस्ने ३६ वर्षीया बन्दना प्रसाईं, २५ वर्षीय महेश नाथ र उर्लाबारी-६ बस्ने ३० वर्षीया कल्पना कँडेल घाइते भएका छन् ।
उनीहरूको अरनिको अस्पताल, उर्लाबारीमा उपचार भइरहेको प्रहरीले जनाएको छ । अरू घाइते भने उपचारपछि घर फर्किएका छन् ।
