विराटनगर । मोरङको ग्रामथान गाउँपालिका-२ झोराहाटस्थित शारदा सेकेन्डरी बोर्डिङ स्कुलले आफ्ना विद्यार्थीलाई साइबर अपराध र लागुऔषध दुर्व्यसनीबाट जोगाउन प्रशिक्षण दिएको छ ।
शुक्रबार विद्यालयमै एक कार्यक्रम गरी दुई अलग विषयमा प्रशिक्षण दिइएको विद्यालयका प्रिन्सिपल सञ्जय मण्डलले जानकारी दिए ।
साइबर अपराध र लागुपदार्थ दुर्व्यसनी आजको डरलाग्दो समस्या भएकाले यसबाट बच्ने उपायका बारेमा विद्यार्थीलाई प्रशिक्षण दिइएको प्रिन्सिपल मण्डलले जनाए ।
उनका अनुसार इलाका प्रहरी कार्यालय, बेलबारीका प्रहरी निरीक्षक तेजबहादुर दाहालले विद्यार्थीहरूलाई साइबर अपराध र लागुऔषध दुर्व्यसनबाट बच्ने उपायका बारेमा प्रशिक्षण दिएका थिए ।
प्रशिक्षणका क्रममा इन्स्पेक्टर दाहालले विद्यार्थीहरू देशका सबल कर्णधार भएकाले शारीरिक, मानसिक तथा सामाजिक रूपमा स्वस्थ रहनका लागि दुर्व्यसनबाट जोगिन विशेष आग्रह गरे ।
अत्यन्त उत्प्रेरक, शिक्षाप्रद तथा जानकारीमूलक सो प्रशिक्षण कार्यक्रममा दाहालले लागुपदार्थ र इन्टरनेटको गलत प्रयोगले घटिरहेका अपराधका बारेमा पनि व्याख्या गरेका थिए ।
प्रहरी चौकी झोराहाटसँगको समन्वयमा प्रशिक्षण कार्यक्रम सम्पन्न भएको थियो, जसमा प्रहरी चौकी झोराहाटका इन्चार्ज कपलेश्वर स्वर्णकारले सानो लापरबाहीले ठुलो नोक्सानी हुन सक्ने बताए ।
स्वर्णकारले आगामी दिनमा समेत यस्ता जनचेतनामूलक कार्यहरू गर्न तयार रहेको प्रतिबद्धता जनाए ।
कार्यक्रममा बोल्दै स्कुलका प्रिन्सिपल मण्डलले विद्यार्थी समाज र देशकै तागतिलो शक्ति भएकाले यस्ता अनुशिक्षण कार्यक्रमले उनीहरूलाई सत्मार्गमा हिँड्न अभिप्रेरित गर्ने बताए ।
प्रिन्सिपल मण्डलले विद्यार्थीहरूको ध्यानाकर्षण गराउँदै प्रशिक्षणमा सिकाइएका सबै कुराहरू विद्यालयको पाठ्यक्रममा उल्लेख भएकाले विद्यार्थीहरूलाई सन्दर्भ सामग्रीको रूपमा समेत प्रयोग हुने बताए ।
हरकाेहीलाई ट्राफिक सचेतनाको आवश्यकता परिरहेको आजको समयमा विद्यार्थीहरूले यस कुराको सन्देश आफ्नो घर र गाउँ समाजमा फैलाएर महत्त्वपूर्ण भूमिका खेल्नुपर्ने प्रिन्सिपल मण्डलको भनाइ थियो ।
इलाका प्रहरी कार्यालय हरैंचाका ट्राफिक प्रहरी सहायक निरीक्षक दुर्गाबहादुर बस्नेत र प्रहरी वरिष्ठ हवल्दार महेन्द्र दाहालले सडक दुर्घटना र सचेतनाका बारेमा प्रकाश पारेका थिए ।
सडक अनुशासन पालन गरेर दुर्घटनालाई न्यूनीकरण गर्न हामी सबैले उत्तिकै लागिपर्नुपर्ने बस्नेतको धारणा थियो ।
