फाइल तस्बिर
विराटनगर । मोरङको विराटनगर महानगरपालिकाका दुई भिन्नाभिन्दै ठाउँमा आइतबार दुईवटा सिटी सफारी दुर्घटनामा परेका छन् ।
ती दुर्घटनामा चार जना घाइते भएको राजमार्ग सुरक्षा तथा ट्राफिक व्यवस्थापन कार्यालय, इटहरीले जनाएको छ ।
हिजो बिहान ११:४५ बजेतिर विराटनगर-१५ नेपाल बैंकछेउस्थित तालिम केन्द्र-विराटनगर भित्री सडक खण्डमा उत्तरबाट दक्षिणतर्फ आउँदै गरेको प्रदेश १-०२-००४ ह २४३० नम्बरको सिटी अनियन्त्रित भई पल्टिएको थियो ।
जसमा सिटी चालक विराटनगर-११ का ४२ वर्षीय मोहन शर्मा र सिटीमा सवार विराटनगर-१३ की ३१ वर्षीया चन्दादेवी राम घाइते भएका छन् ।
उनीहरूलाई उपचारका लागि कोशी अस्पताल, विराटनगर पठाएर इलाका प्रहरी कार्यालय, रानीले सिटी भने नियन्त्रणमा लिएको छ ।
यस्तै, हिजो साँझ ६:१५ बजेतिर विराटनगर-१३ डिआजी मोडस्थित कोशी लोकमार्गमा रानीबाट विराटनगरतर्फ आउँदै गरेको विराटनगर १ ह. ०५९८ नम्बरको सिटी दुर्घटनामा परेको थियो ।
सिटीको पछाडीको चक्का अचानक खुस्किएर दुर्घटना हुँदा सिटीमा सवार विराटनगर-६ का ५६ वर्षीय दयानन्द महतो र विराटनगर-८ की ४० वर्षीया पिंकीदेवि साह घाइते भएका छन् ।
घाइते दुवै जनालाई उपचारका लागि न्युरो अस्पताल विराटनगर पठाएको छ ।
इलाका प्रहरी रानीले सिटी र सिटी चालक विराटनगर-१८ का ४० वर्षीय अलमुल मियाँलाई नियन्त्रणमा लिएको छ ।
