विराटनगर । कोशी प्रदेशमा हात्तीको कारण मानवीय र भौतिक क्षति बढेपछि कोशी प्रदेश सरकारले नागरिकसँग सुझावका लागि संवाद पदयात्रा गर्ने तयारी गरेको छ ।
प्रदेश सरकारका मुख्यमन्त्री केदार कार्की, पर्यटन तथा वन मन्त्री गणेश उप्रेतीसहित सरकारी टोलीले एक सातासम्म हात्तीमैत्री पदयात्रा गर्ने भएका छन् ।
पर्यटन, वन तथा वातावरण मन्त्रालयका अनुसार आगामी फागुन ९ गतेदेखि झापाको बाहुँनडाँगीदेखि उदयपुरको बेलकासम्मको २४० किलोमिटर दुरीमा पैदलयात्रा हुने छ ।
पर्यटन प्रवर्द्धन तथा प्रकृति संरक्षणका लागि हात्तीमैत्री पदयात्रा दिइएको कार्यक्रमको तयारी भइरहेको मन्त्रालयका प्रवक्ता अखिलेशकुमार गुप्ताले जानकारी दिए ।
हात्ती करिडोरको रुट, दैनिक पैदलयात्राको दुरी र वासस्थान, प्रभावित क्षेत्रका नागरिकसँगको कुराकानीबारे कार्यक्रमको खाका मन्त्रालयले तयार गरिरहेको छ ।
हात्तीले प्रयोग गर्दै आएको बाटो भएर पदयात्रा हुने छ ।
त्यसक्रममा हात्तीको जैविग मार्ग संरक्षण, हात्ती प्रभावित क्षेत्रमा रहेका बस्तीहरूको स्थान्तरण र हात्तीलाई मानव वस्तीमा आउन नदिने उपायबारे छलफल हुने सरकारले जनाएको छ ।
सरकारी टोली प्रभावित क्षेत्रका नागरिकको गुनासो, सुझाव प्रत्यक्ष सुनेर आगामी योजना निर्माण गर्ने छ ।
मुख्यमन्त्री कार्कीले जंगली हात्तीलाई व्यवस्थापन गर्न हात्ती कोरिडोर बनाएर पर्यटन प्रवर्द्धन गर्न सकिने बताउँदै आएका छन् ।
हात्ती हेर्ने पर्यटक भित्र्याएर पर्यटनको विकास गर्ने सम्भावनाबारे पदयात्रा गर्न लागेको उनको भनाइ छ ।
जंगली जनावरको वासस्थान संकटमा पर्दै गएको र खानेकुराको समेत अभाव हुन थालेकोले उनीहरू मानवबस्तीमा पसेको बताउँदै मुख्यमन्त्री कार्कीले हात्ती कोरिडोरको लागि प्रदेश सरकारले पहल गरेको उल्लेख गरे ।
कोरिडोरमा भएका स्थानीयलाई मुआब्जा दिएर अर्को बस्तीमा स्थानान्तरण गर्न सरकार तयार रहेको उनको भनाइ छ ।
