इटहरी । इटहरी उपमहानगरपालिकाले जनयुद्धका पीडित सय परिवारको निःशुल्क बिमा गरिदिने भएको छ ।
उपमहानगर प्रमुख हेमकर्ण पौडेलले मंगलबार जनयुद्ध दिवसको अवसरमा इटहरीमा रहेका एकसय द्वन्द्व पीडित घर परिवारको निःशुल्क स्वास्थ्य बिमा गरिदिने निर्णय गरेका हुन् ।
नेकपा माओवादी केन्द्रको नेताहरूसँग भेटपछि पौडेलले एक सय द्वन्द्व पीडित घर परिवारको निःशुल्क स्वास्थ्य बिमा इटहरी सरकारले गर्ने निर्णय गरेका हुन् ।
जनयुद्ध दिवसको अवसरमा तत्काल लागू हुनेगरी यही आर्थिक वर्षमा कुनै संस्थामार्फत इटहरीमा भएका एक सय द्वन्द्व पीडित घर परिवारलाई निःशुल्क स्वास्थ्य बिमा गर्न चार लाख रकम दिने निर्णय गरेका हुन् ।
इटहरी नगर क्षेत्रमा बसोबास गर्ने परिवारको बिमा गरिदिने भएपछि आफूहरू अत्यन्तै खुसी भएको माओवादीका इटहरी नगर अध्यक्ष बहादुर तामाङले प्रतिक्रिया दिए ।
पीडितहरूको नाम तयार गरेर मेयरलाई बुझाउने तामाङले बताए ।
