गाइघाट । कोशी प्रदेशका मुख्यमन्त्री केदार कार्कीले आफ्नो व्यक्तिगत स्वार्थमा विकासको परिभाषा हुने गरेको बताएका छन् ।
त्रियुगा उद्योग वाणिज्य संघ गाईघाटले मङलबार आयोजना गरेको दोस्रो प्रदेश महोत्सवको उद्घाटन गर्दै मुख्यमन्त्री कार्कीले आफ्नो स्वार्थको काम नहुँदा विकासै भएन भनेर एकथरिले भ्रम फैलाइरहेको बताएका हुन् ।
‘सबै जना आउँदा आफ्नो घरअगाडिको बाटो मन्दिर चाहियो भन्दै आउनुहुन्छ, बालबालिका समाजको लागि कोही आउनुभएको छ र आफ्नो अगाडिको बाटो नबन्दा विकासै भएन भनेर प्रचार भइरहेको छ,’ उनले भने ‘सूचना र प्रविधिको यो समयमा कोशी प्रदेशले विकाशको गतिमा फट्को मारिरहेको छ । दीगो विकासका लागि हामीले कोशी प्रदेशमा मानवीय विकासबाट सुरुवात गरिसकेका छौँ ।’
मुख्यमन्त्री कार्कीले उत्पादन भनेको समान मात्रै नभई जनशक्तिलाई दक्ष बनाउने अभियान पनि भएको उल्लेख गरे ।
‘बाजा बजाउन जान्ने मान्छे भयो भने बाजा चाहिन्छ । त्यसको लागि पहिरन चाहिन्छ, मान्छे दक्ष भएन भने कसरी त्यसको उत्पादन कहाँ हुन्छ ? त्यस कारण हामीले मानवीय विकासलाई अगाडि बढाएका छौँ ।’
