धनकुटा । ट्र्याक्टरले किचेर घाइते भएका धनकुटाको चौबिसे गाउँपालिकाका दिलप्रसाद तामाङलाई ढाँटेर अस्पताल पुर्याइएको पाइएको छ ।
शनिबार दिउँसो १ बजेतिर चौबिसे-८ अठारसय बस्ने ३६ वर्षीय तामाङलाई रुख काट्ने क्रममा रुखको मुढाले किचेर घाइतथे भएको भन्दै धरानस्थित बिपी कोइराला स्वास्थ्य विज्ञान प्रतिष्ठान पुर्याइएको थियो ।
अस्पताल पुर्याइँदा गम्भीर अवस्थामा रहेका तामाङको सोही दिन साँझ ७:१० बजेतिर उपचारका क्रममा मृत्यु भएको थियो ।
इलाका प्रहरी कार्यालय, राजारानीबाट प्रहरी निरीक्षक उमेश राईको टोलीले अनुसन्धानका गर्दा उनलाई ट्र्याक्टरले किचेको पाइएको छ ।
आइतबार गरिएको सोधपुछका क्रममा चौबिसे-८ आठारसयस्थित भित्री कच्ची सडकखण्डमा को.२ त ५०६३ नम्बरको ट्र्याक्टरले किचेको खुलेको प्रहरी निरीक्षक राईले जानकारी दिए ।
उनका अनुसार चौबिसे-८ कै ३२ वर्षीय टंकबहादुर खड्काले चलाएको ट्र्याक्टर सल्लेरी आमडाडाबाट आठारसयतर्फ
जाँदै थियो ।
काठ लोड गरी ल्याउँदै गरेको अवस्थामा उक्त ट्र्याक्टरमा सवार रहेका तामाङ ट्र्याक्टरबाट भुइँमा खसेका थिए ।
गुडिरहेको ट्र्याक्टरले किचेर उनी गम्भीर घाइते भएका थिए ।
चालकको लापरबाहीले गर्दा तामाङको मृत्यु भएपछि ट्र्याक्टर र चालकलाई जिल्ला प्रहरी कार्यालय, धनकुटाले नियन्त्रण लिएको छ ।
यस विषयमा थप अनुसन्धान भइरहेको धनकुटा प्रहरीले जनाएको छ ।
