विराटनगर । जिल्ला अदालत सुनसरीका एक सेवाग्राहीले आफूलाई प्रहरीले कुटपिट गरी सुनको सिक्री थुतेको आरोप लगाएका छन् ।
आइतबार पत्रकार महासंघ, मोरङमा पत्रकार सम्मेलन गर्दै इटहरी उपमहानगरपालिका–२ का ४० वर्षीय शंकर खत्रीले प्रहरीद्वारा कुटपिट र लुटपाट भएको आरोप लगाएका हुन् ।
गत पुस २९ गते दिउँसो १ बजेतिर इनरुवास्थित सुनसरी जिल्ला अदालतमा आफूमाथि प्रहरीले अभद्र व्यवहार गर्दै तीन तोलाको सुनको सिक्री लुटपाट भएको खत्रीको भनाइ छ ।
अदालतपछाडि रहेको बारीमा लगेर इलाका प्रहरी कार्यालय दमकका प्रहरी नायब उपरीक्षक मनोज लामा र सुनसरी अदालतको विशेष प्रहरी बताउने सञ्जीव अधिकारीले आफूमाथि कुटपिट र लुटपाट गरेको उनको आरोप छ ।
‘काम विशेषले अदालत गएका बेला मलाई अश्लील गाली गर्दै उहाँहरूले बाहिर लैजानुभयो,’ खत्री भन्छन्, ‘दुर्व्यवहार गर्दै सुनको सिक्री थुतेर गोजीमा हाल्नुभयो । डिआइजीको आदेश छ भन्दै मलाई हत्कडी लगाएर झापा पु¥याइयो ।’
इलाका प्रहरी कार्यालय दमक पु¥याएर दुर्व्यवहार गरेर घर पठाइएको भए पनि सुनको सिक्री फिर्ता नदिएको खत्रीको आरोप छ ।
यता, दमक प्रहरी कार्यालयका डिएसपी लामाले भने घटनाबारे अस्वीकार गरे । ‘म त उहाँलाई चिन्दिनँ पनि, अहिलेसम्म देखभेट नै भएको छैन,’ शब्द एक्सप्रेससँगको कुराकानीमा डिएसपी लामाले भने, ‘खै कुन नियतले उहाँ मेरो पछि लाग्नुभयो, थाहा भएन ।’
अब, आरोप लागेपछि आफूमाथि अनुसन्धान हुने र घटनास्थलमा रहेको सिसी टिभी फुटेजले आफ्नो असंलग्नता प्रष्ट हुने डिएसपी लामाको भनाइ छ । ‘ठगीको केसमा अरू कसैले उहाँलाई समातेर ल्याएको थियो, दमकमा पीडितले दिएको जाहेरीका आधारमा ल्याइएकोसम्म थाहा छ,’ उनले थपे, ‘तर उहाँले सुनको सिक्री लुटेको नै भन्नुहुन्छ, कस्तो नियत राख्नुभएको रहेछ ।’
डिएसपी लामाका अनुसार गत असारमा उनीविरुद्ध ठगी मुद्दामा जाहेरी परेको थियो । दमक नगरपालिका–५ का काँशी सापकोटाले दिएको उजुरीका आधारमा उनलाई पुस अन्तिमतिर पक्राउ गरिएको थियो । तर, उनलाई पक्राउ गर्ने दमक प्रहरीको टोलीमा आफू नरहेको बताउँदै डिएसपी लामाले त्यतिकै आरोप लगाइएको दाबी गरे ।
काठ व्यावसायीसमेत रहेका सापकोटाले भने खत्रीले आफूलाई दुःख दिएको बताउँदै अहिले प्रहरीमाथि पनि अनावश्यक रूपमा आरोप लगाएको दाबी गरे । ‘मलाई उहाँले दुई लाख ३७ हजार दिनुपर्ने थियो, वर्षौंअघि सापटी लिनुभएको थियो,’ उनले भने, ‘विराटचोकमा बोलाएर चेक दिएपनि खातामा रकम अभाव देखाउँदा साट्न सकिनँ । अनि, इलाकामा जाहेरी दिएको थिएँ । उहाँले प्रहरीमाथि उल्टै आरोप लगाउनुभएछ ।’
