विराटनगर । कोशी प्रदेशका मुख्यमन्त्री केदार कार्कीले कारागारलाई सुधार र सिकाइको केन्द्रका रूपमा लिनुपर्ने बताएका छन् ।
जिल्ला कारागार मोरङले आइतबार कारागार परिसरमा आयोजना गरेको ‘डबल डेकर’ (खाट) कैदीबन्दीलाई हस्तान्तरण गरेको कार्यक्रममा बोल्दै मुख्यमन्त्री कार्कीले यस्तो बताएका हुन् ।
मुख्यमन्त्री कार्कीले कारागारबाट सिकेको ज्ञान र सीपलाई समाज रूपान्तरण र सुधारमा प्रयोग गर्न कैदीबन्दीलाई सुझाव दिए ।
सरकारले कारगारमा दिने परम्परागत सीपलाई आधुनिकीकरण गर्न प्राविधिक अध्ययन गरिरहेको जानकारी दिँदै उनले बन्दीले उत्पादन गरेका सामग्रीको बजारीकरण तथा पहुँच विस्तार गरिने बताए ।
बन्दीहरूको मानव अधिकारको संरक्षण, स्वास्थ्य सेवा, कानुनी सहायताका सम्बन्धमा प्रदेश सरकारले चाँडै अवधारणा ल्याउने तयारी गरिरहेको जानकारी उनले दिए ।
मुख्यमन्त्री कार्कीले कारागारलाई होस्टलका रूपमा सम्झन आग्रह गर्दै यहाँबाट सिकेका सीपलाई साना उद्यमीका रूपमा विकास गर्नुपर्ने भन्दै आवश्यक पुँजीको व्यवस्थाका लागि सरकारले सहजीकरण गर्ने बताए ।
कारागार व्यवस्थापन विभागका महानिर्देशक काशीराज दाहालले कैदीबन्दीको सेवा सुविधा वृद्धि, थप बजेटको व्यवस्था, नीति निर्माणमा जोड दिएको बताए ।
मोरङका प्रमुख जिल्ला अधिकारी प्रेमप्रसाद भट्टराई र मोरङ कारागारका प्रमुख कृष्णहरि न्यौपाने कैदीबन्दीको सेवा सुविधा वृद्धिका लागि आवश्यक पहल भइरहेको बताएका थिए ।
मोरङ कारागारमा हाल ९९ महिला (चार जना बालबालिका आश्रित)सहित एक हजार ३८ कैदीबन्दी छन् ।
