विराटनगर । पछिल्लो समय समाज सेवामा तल्लीन रहेका अभिषेक गिरिले विपन्न वर्गका बिरामीलाई मध्यनजर गर्दै आयोजना गरेको निःशुल्क स्वास्थ्य शिविरमा ७५५ जनाले स्वास्थ्य जाँच गराएका छन् ।
गिरिले स्थापना गरेको गिरि फाउन्डेसन र पारस मल्टिस्पेसियालिटी हस्पिटलले शनिबार विराटनगर महानगरपालिका–८ स्थित श्री ज्ञानकुञ्च आधारभूत विद्यालयमा शिविर चलाएका थिए ।
उल्लेखनीय सर्वसाधारणको उपस्थिति रहेको सो शिविरमा ७५५ जनाले निःशुल्क स्वास्थ्य जाँच गराएका छन् । जसमध्ये एक सय ८० जनाको इसिजी जाँच र २८० जनाको रक्तचाप र सुगर परीक्षण गरिएको छ ।
शिविरमा आएका अधिकांश सेवाग्राहीले निःशुल्क स्वास्थ्य शिविरबाट लाभान्वित भएको बताएका छन् । यस्ता शिविरबाट खर्चिलो उपचारको पहुँचबाट टाढा रहेका गरिब–निमुखाले सेवा पाउने उनीहरूको भनाइ छ ।
यता, फाउन्डेसनका अध्यक्ष अभिषेक गिरिले प्रत्येक शनिबार निःशुल्क स्वास्थ्य शिविरलाई निरन्तरता दिने बताउँदै पहिलो चरणमा विराटनगरका १९ वटै वडामा र विस्तारै अरू पालिकामा पनि गरिने बताए ।
गिरिले आफ्नो फाउन्डेसनमार्फत् निःशुल्क स्वास्थ्य शिविर आयोजना गरी बिरामीहरूलाई सुलभ र सहज उपचार सेवा उपलब्ध गराउने उल्लेख गरे ।
विपन्न वर्गका बिरामीले स्वास्थ्योपचार नपाइरहेको परिस्थितिलाई मध्यनजर गरेर स्वास्थ्य शिविर चलाइएको उनको भनाइ छ ।
पारस हस्पिटलका वरिष्ठ हाडजोर्नी तथा नसारोग विशेषज्ञ डा. फेजल अन्सारीले शिविरमा स्वास्थ्य जाँच गराउनेहरूलाई करिब पाँच लाख रुपैयाँ बराबरको औषधि निःशुल्क वितरण गरिएको बताए ।
परीक्षणमा आएका अधिकांश विपन्न वर्गका रहेको बताउँदै उनले यस्तो शिविरले उपचारको पहुचभन्दा पर रहेकाले लाभ लिने बताए ।
निःशुल्क स्वास्थ्य शिविरमा बालबालिकादेखि वृद्ध–वृद्धाले निःशुल्क स्वास्थ्य जाँच गराउँदै विशेषज्ञ चिकित्सकसँग परामर्श लिएका थिए । उनीहरूलाई निःशुल्क रूपमा औषधिसमेत वितरण गरिए पारस हस्पिटलका प्रबन्ध निर्देशक हेमनारायण मेहताले जानकारी दिए ।
अस्पतालको पहुँचबाट टाढा रहेका विपन्न वर्गका सर्वसाधारणलाई मध्येनजर गरी गिरि फाउन्डेसन र पारस हस्पिटलले संयुक्त रूपमा निःशुल्क स्वास्थ्य शिविर आयोजना गर्न सम्झौता भएको थियो ।
जसअनुसार शिविर गर्ने स्थानदेखि स्वास्थ्य सामग्रीमा लाग्ने खर्च व्यवस्थापनसम्म फाउन्डेसनले गर्नेछ भने चेकजाँच अस्पतालले गर्ने उल्लेख छ ।
