विराटनगर । मोरङको ग्रामथान गाउँपालिकामा बिजुलीको पोलमा मोटरसाइकल ठोक्किँदा एक जनाको मृत्यु भएको छ ।
मृत्यु हुनेमा कटहरी गाउँपालिका-७ का अन्दाजी ३२ वर्षीय मनोज विश्वास रहेको राजमार्ग सुरक्षा तथा कोशी प्रदेश ट्राफिक व्यवस्थापन कार्यालय, इटहरीले जनाएको छ ।
मंगलबार बेलुका ८:१० बजेतिर ग्रामथान-२ सुखानी खोला छेउमा झोराहाटबाट थलाहातर्फ जाँदै गरेको को २३ प ४९ नम्बरको मोटरसाइकल दुर्घटना भएको थियो ।
आफैं अनियन्त्रित भई मोटरसाइकल बिजुलीको पोलमा ठोक्किएपछि चालक विश्वास गम्भीर घाइते भएका थिए ।
टाउकोमा चोट लागेका विश्वासको विराटनगरस्थित कोशी अस्पताल पुर्याइएको थियो । तर, बेलुका पौने ९ बजेतिर डाक्टरले मृत घोषणा गरेको ट्राफिक प्रहरीले जनाएको छ ।
दुर्घटनामा परेको मोटसाइकल प्रहरी चौकी झोराहाटको नियन्त्रणमा रहेको छ । तीब्र गतिका कारण दुर्घटना भएको ट्राफिक प्रहरीको प्रारम्भिक अनुसन्धानले देखाएको छ ।
मादक पदार्थ सेवन गरे-नगरेको तथा सवारी चालक अनुमतिपत्र भए-नभएको भन्नेबारे अनुसन्धान भइरहेको प्रहरीले जनाएको छ ।
