विराटनगर । वन व्यवस्थापन विषयमा स्नातक तहमा अध्ययनरत विद्यार्थीहरूले कोशी प्रदेशको पर्यटन, वन तथा वातावरण मन्त्रालयमा ‘इन्टर्नसिप’ को अवसर पाउने भएका छन् ।
आइतबार सूचना प्रकाशन गर्दै मन्त्रालयले इन्टर्नसिप कार्यक्रम सञ्चालनका लागि मन्त्रालयमा प्रस्तव वा आशयपत्र पेस गर्न आग्रह गरेको हो ।
आर्थिक वर्ष २०८०/८१ को स्वीकृत वार्षिक कार्यक्रमअनुसार वन व्यवस्थापन स्नातक तहमा अध्ययनरत विद्यार्थीहरूको लागि इन्टर्नसिप कार्यक्रम रहेको मन्त्रालयका सचिव विशाल घिमिरेले जानकारी दिए ।
उनका अनुसार नेपाल सरकारबाट मान्यताप्राप्त विश्वविद्यालय, अध्ययन संस्थान, कलेजमा वन व्यवस्थापन स्नातक तहमा चौथो वर्षमा अध्ययनरत विद्यार्थीहरूले इन्टर्न गर्न पाउने छन् ।
इन्टर्नसिपको कार्यक्रम सञ्चालन गर्न मन्त्रालयमा गठन भएको इन्टर्नसिप कार्यक्रम सञ्चालन सहजीकरण समितिको निर्णयले सूचना प्रकाशन भएको मितिले सात दिनभित्र सम्बन्धित विद्यालयले प्रस्ताव पेस गर्न सक्ने छन् ।
