कानेपोखरी । मोरङको कानेपोखरमा शनिबार भएका दुई सवारी दुर्घटनामा परी एक जनाको मृत्यु भएको छ भने दुई जना घाइते भएका छन् ।
गए राति ९:२० बजे पूर्व–पश्चिम लोकमार्गअन्तर्गत कानेपोखरी-७ मा टाटा पिकअप गाडीको ठक्करबाट एक महिलाको मृत्यु भएको छ ।
मृतकको पहिचान भने खुलेको छैन ।
झापाबाट इटहरीतर्फ आउँदै गरेको प्र ३-०१-०२४ च ७३७७ नम्बरको टाटा पिकअप गाडीले जंगल क्षेत्रमा ती महिलालाई ठक्कर दिएको थियो ।
सोही स्थानमा पैदल हिँडिरहेकी अन्दाजी ४०/४५ वर्षीया उनलाई गाडीले ठक्कर दिएको थियो ।
दुर्घटनामा उनको टाउकोमा चोट लागेपछि उर्लाबारीस्थित मदन भण्डारी अस्पताल तथा
ट्रमा सेन्टर पठाइएको थियो ।
अस्पताल पुर्याउनासाथ उनलाई अस्पताल प्रशासनले ११ बजेतिर मृत घोषणा गरेको इलाका प्रहरी कार्यालय पथरीले जनाएको छ ।
शवलाई पोस्टमार्टमका लागि सोही अस्पतालमा राखेर मृतकको पहिचानको प्रयास भइरहेको इलाका प्रहरी कार्यालय पथरीका प्रहरी नायब उपरीक्षक गणेश श्रेष्ठले बताए ।
डिएसपी श्रेष्ठका अनुसार पिकअप र चालक सोलुखुम्बुको नेचासल्यान गाउँपालिका–४ का ४५ वर्षीय मिलनकुमार राईलाई नियन्त्रणमा लिएर घटनाको अनुसन्धान सुरु गरिएको छ ।
पिकअपको तीव्र गतिका कारण दुर्घटना भएको प्रारम्भिक अनुसन्धानबाट खुलेको प्रहरीले जनाएको छ ।
यस्तै, शनिबार साँझ साढे ६ बजेतिर कानेपोखरी-६ रमाइलो बजारमा मोटरसाइकलले पैदलयात्रीलाई ठक्कर दिई दुर्घटना भएको थियो ।
कानेपोखरी-रंगेलीस्थित सडकखण्डमा कानेपोखरीबाट रंगेलीतर्फ जाँदै गरेको बा ४३ प ५०८४ नम्बरको मोटरसाइकलले सोही दिशातर्फ जाँदै गरेका आमा-छोरालाई ठक्कर दिएको थियो ।
तत्काल नामथर नखुलेको अन्दाजी २५/३० वर्षकी महिला र उनकै छोरा अन्दाजी पाँच वर्षीया बालकलाई मोटरसाइकलले ठक्कर दिएको थियो ।
मोटरसाइकलको ठक्करबाट घाइते भएका दुवै जनलाई उपचारका लागि विराटनगरस्थित नोबेल अस्पताल पठाइएको पथरी प्रहरीले जनाएको छ ।
प्रहरीका अनुसार महिलाको पेटमा चोट लागेको छ भने बालकको शरीरको विभिन्न भागमा चोट लागेको छ ।
बालकको अवस्था भने गम्भीर रहेको प्रहरीको भनाइ छ ।
प्रहरी चौकी रमाइलोले मोटरसाइकल र मोटरसाइकल चालक कानेपोखरी-३ बस्ने ५० वर्षीय अछुतप्रसाद
दाहाललाई नियन्त्रणमा लिएको छ ।
मोटरसाइकल चालकको लापरबाहीका कारण दुर्घटना भएको प्रहरीको प्रारम्भिक अनुसन्धानले देखाएको छ ।
