विराटनगर । काठमाडौंको बाँसबारी छालाजुत्ता उद्योगको १० रोपनी जग्गा हडपेको आरोपमा पक्राउ परेका अरुण चौधरीलाई हिरासतमा राख्न अदालतले आदेश दिएको छ ।
नेपाल प्रहरीको केन्द्रीय अनुसन्धान ब्युरो (सिआइबी) को टोलीले चौधरीलाई बिहीबार लाजिम्पाटको निवासबाटै पक्राउ गरेको थियो ।
जग्गा घोटाला प्रकरणमा पक्राउ परेका व्यवसायी चौधरी र छालाजुत्ता कारखानाका तत्कालीन सञ्चालक समितिका कार्यकारी प्रमुख अजितमानसिंह थापा पक्राउ परेका थिए ।
सिआइबीको टोलीले व्यवसायी चौधरीलाई काठमाडौँको लैनचौर र थापालाई काठमाडौँको बत्तिसपुतलीबाट पक्राउ गरेको थियो ।
उनीहरू दुवैलाई जिल्ला अदालत काठमाडौंले चार दिन हिरासतमा राख्न अदालतले अनुमति दिएको हो ।
न्यायाधीश माधवप्रसाद घिमिरेको इजलासले चौधरी र थापालाई आवश्यक अनुसन्धानका लागि हिरासतमा राख्न अनुमति दिएको जिल्ला अदालतका सूचना अधिकारी चन्द्रप्रसाद पन्थीले जानकारी दिए ।
बाँसवारी छाला जुत्ता कारखानाको १० रोपनी जग्गा घोटाला प्रकरणमा निजहरूलाई पक्राउ गरिएको ब्युरोले जनाएको छ ।
अरुण चौधरी सिजी होल्डिङ्सका चेयर म्यान हुन् ।
