विराटनगर । मोरङको कानेपोखरी गाउँपालिकाको कार्यालयमा कार्यरत कार्यालय सहयोगी काममा फर्किएका छन् ।
गाउँपालिका अध्यक्ष-उपाध्यक्षबीचको लफडामा चेपिएका कार्यालय सहयोगी पदमप्रसाद भट्टराई बुधबारबाट काममा फर्किएका हुन् ।
अनुमतिबिना आफ्नो कार्यालयको ढोका खोलिदिएको भन्दै कानेपोखरी गाउँपालिकाकी अध्यक्ष राजमति इङ्नामले उनलाई निलम्बन गरेकी थिइन् ।
तर, सर्वत्र आलोचना भएपछि अध्यक्ष इङ्नामले भट्टराईलाई बुधबारदेखि काममा बोलाएको गाउँपालिका कर्मचारी स्रोतले जनाएको छ ।
‘हिजैदेखि उहाँ काममा फर्किनुभएको छ,’ स्रोतले भन्यो, ‘अध्यक्षज्यूले नै उहाँलाई काममा डाक्नुभएको थियो ।’
आफू बाहिर भएको बेला अनुमतिबिना आफ्नो कार्यकक्षको ढोका खोलेको भन्दै इङ्नामले भट्टराईलाई निलम्बन गरेकी थिइन् ।
अध्यक्ष इङ्नाम र उपाध्यक्ष भोला अधिकारीबीच भएको विवादको मारमा कार्यालय सहयोगी भट्टराई परेका थिए ।
केही दिनअघि बसेको कार्यपालिका बैठकमा उपाध्यक्ष अधिकारी र वडा नम्बर २ का वडाध्यक्ष सुशील बुढाथोकीबीच चर्काचर्की परेको थियो ।
अध्यक्षको कार्यकक्षमा बसेको बैठकमा विवाद बढ्दै जाँदा उपाध्यक्ष अधिकारीले मुड्की बजारेर सिसाको टेबल फुटाएका थिए ।
अध्यक्ष तेह्रथुम गएको बेला गत बिहीबार उपाध्यक्ष अधिकारीले कार्यालय सहयोगी भट्टराईलाई सिसा फेर्न निर्देशन दिएका थिए ।
अध्यक्षले कार्यकक्षको ताला नखोल्न निर्देशन दिएकोले उनको सचिवालयमा बस्ने कार्यालय सहयोगीले सुरुमा ताला खोल्न मानेका थिएनन् ।
तर, उपाध्यक्षको निर्देशनले गर्दा अध्यक्षको कार्यकक्षको कोठा खोल्न बाध्यता परेका भट्टराईलाई इङ्नामले निलम्बन गरेकी थिइन् ।
