विराटनगर । मोरङ बूढीगंगा गाँउपालिकास्थित ट्राफिक प्रहरी पोस्ट नेमुवाले सिटी सफारीचालकहरूलाई ट्राफिक नियमबारे प्रशिक्षण दिन थालेको छ ।
सवारी दुर्घटना न्यूनीकरण गर्ने उद्देश्यस्वरूप नेमुवा ट्राफिक प्रहरीले सिटी सफारी चालकहरूलाई ट्राफिक नियम सिकाएको हो ।
बूढीगंगा-३ बाँसबारीस्थित खालीचौरमा चारसय सिटी सफारीका चालकलाई भेला पारेर ट्राफिक नियमहरूको अवगत गराइएको ट्राफिक प्रहरी पोस्ट नेमुवाका इन्चार्ज एवम् प्रहरी सहायक निरीक्षक (असई) तुलामणि आचार्यले जानकारी दिए ।
उनका अनुसार बढ्दो सवारी दुर्घटनालाई मध्यनजर गरेर सवारी चालकले अपनाउनुपर्ने सावधानी र ट्राफिक नियमको विषयमा जानकारी दिन थालिएको हो ।
चालकहरूलाई सडक सुरक्षाका लागि अपनाउनु पर्ने ट्राफिक नियम सिकाइएको उनले बताए । साथै, सवारी चालक अनुमतिपत्र अनिवार्य बनाएर साथमा राख्न अनुरोध गरिएको आचार्यको भनाइ छ ।
सवारी दुर्घटना न्यूनीकरण गर्ने लक्ष्यसहित थालनी गरिएको यो अभियानलाई निरन्तरता दिइने असई आचार्यले जनाए ।
ट्राफिक प्रहरीले सवारी दुर्घटनाबाट आफू जोगिन र अरूलाई जोगाउन अपनाउनुपर्ने सावधानीका बारेमा समेत सचेत गराएको हो ।
