विराटनगर । कोशी प्रदेश सरकारले सांसदलाई गाडी-सुविधा थप्न आँटेपछि नेपाली कांग्रेसका केन्द्रीय सदस्य डा शेखर कोइरालाले असन्तुष्टि जनाएका छन् ।
‘समुदायमा कांग्रेस’ अभियानअन्तर्गत मंगलबार विराटनगर महानगरपालिका-७मा आयोजित कार्यक्रममा बोल्दै डा. कोइरालाले कोशी प्रदेश सरकारको उक्त कदमबारे असन्तुष्टि जनाएका हुन् ।
उनले कोशी प्रदेशसभाका पदाधिकारीहरूलाई भौतिक सुविधा थप्ने कुरा उपयुक्त नभएको बताए ।
‘प्रदेश सरकारले जनताका आधारभूत सुविधा थाप्ने हो तर आफ्नो सेवा सुविधा बढाउने होइन, ‘ उनले भने, ‘यसरी आफैँले आफ्ना लागि सुविधा थप्ने काम गर्दा मुलुकमा लोकतन्त्र नेताहरुलाई मात्र आएको सन्देश जान्छ । यसैले लोकतन्त्रको फल नागरिकले पनि पाउनेगरी काम गर्नुपर्छ ।’
कांग्रेस नेता डा कोइरालाले नेपाली कांग्रेस पार्टी समुदायमा पुगेर जनभावना बुझेर आगाडि बढ्नुपर्नेमा जोड दिए ।
पार्टीभित्र देखिएका कमीकमजोरीलाई सच्याउँदै अघि बढ्नुपर्ने र कांग्रेस देशका कुनाकाप्चासम्म तथा हरेक नेपालीका घरमा पुग्नुपर्ने बताए ।
