विराटनगर । सुनसरीको हरिनगरा गाउँपालिकामा सोमबार राति भएको दुर्घटनामा परेर घाइते भएका एक जनाको उपचारका क्रममा मृत्यु भएको छ ।
राजमार्ग सुरक्षा तथा कोशी प्रदेश ट्राफिक प्रहरी कार्यालय, इटहरीका अनुसार मृत्यु हुनेमा हरिनगरा-१ गोडियारी टोलका ३२ वर्षीय वीरेन्द्र बहदार रहेका छन् ।
सोमबार बेलुकी ८:४५ बजे गोडियारी टोलस्थित भित्री सडकखण्डमा भुटाहा चोकबाट फुलचोकतर्फ जाँदै गरेको प्र १-०५२ प ३८६७ नम्बरको मोटरसाइकलले पैदलयात्रीलाई ठक्कर दिएको थियो ।
मोटरसाइकलको ठक्करबाट बहदारको कम्मरमा चोट लागेको थियो । घाइते बहदारको उपचारका क्रममा विराटनगरस्थित पारस अस्पतालमा मंगलबार साँझ ६:३० बजे मृत्यु भएको हो ।
प्रहरीले मोटरसाइकल चालक मोरङ विराटनगर महानगरपालिका-१ घर भएका ३५ वर्षीय दुर्गा नेपाल पक्राउ परेका छन् ।
नेपाल सशस्त्र बेस भुटाहा सुनसरीमा कार्यरत सहायक प्रहरी हवल्दार हुन् । नेपाललाई जिल्ला प्रहरी कार्यालय, सुनसरीले नियन्त्रणमा लिएको हो ।
उनले चलाएको मोटरसाइकल भने प्रहरी चौकी भुटाहाले नियन्त्रणमा लिएको छ ।
ट्राफि प्रहरी पोस्ट हरिनगराबाट अन्दाजी ओक किलोमिटर पूर्वमा उक्त दुर्घटना भएको थियो । बाक्लो हुस्सुका कारण दुर्घटना भएको ट्राफिक प्रहरीको प्रारम्भिक निष्कर्ष छ ।
चालकले मादक पदार्थ सेवन गरे-नगरेको भने खुलेको छैन ।
